Ցանկանում ենք, որ Քաջարանի թունելը կառուցի իրանական ընկերություն, իրանական վարկով. Գնել Սանոսյան

«Հյուսիս-Հարավ» մայրուղու Քաջարանի թունելի կառուցման հարցը քննարկվել է իրանական կողմի հետ: Այս մասին այսօր՝ նոյեմբերի 7-ին, լրագրողների հետ զրույցում հայտարարեց ՏԿԵ նախարար Գնել Սանոսյանը:

«Մայրուղու Սյունիքի հատվածը երեք կողմ ունի՝ Սիսիանից դեպի Քաջարան, Քաջարանի թունել եւ Քաջարանից դեպի Ագարակ: Մյուս երկու հատվածների մասով ունենք գործընկերներ, որոնց հետ քննարկումների փուլն արդեն անցել ենք: Հստակ են ֆինանսավորման աղբյուրները, եւ ունենք մրցութային գործընթաց: Թունելի մասով ցանկանում ենք աշխատել իրանցի գործընկերների հետ աշխատել, եւ եթե հնարավոր է իրանական վարկով կամ պետբյուջեի միջոցներով հարմար տարբերակով իրանական ընկերության հետ: Նախ իրանական ընկերությունները կարողություններ ունեն լավ թունելներ կառուցելու, եւ բացի դա նրանք կարող են ֆինանսական տեսանկյունից լավ առաջարկներ ներկայացնել»,- ասաց Սանոսյանը:

Գնել Սանոսյանի խոսքով՝ Լարսում մեքենաների մեծ կուտակումներն առաջանում են, քանի որ Ռուսաստանի համապատասխան ծառայությունները ստիպված են ավելի մանրամասն ուսումնասիրել ավտոմեքենաները:

«Թոհունակությունը նվազում է, սակայն մենք մեր ռուս եւ վրացի գործընկերների հետ փորձում ենք կարգավորել խնդիրը»,- նշեց նա:

Հնարավո՞ր է, որ իշխող ուժը խաղաղության պայմանագիրը ստորագրի, քանի դեռ ադրբեջանական ուժերը Հայաստանի ինքնիշխան տարածքում են: Սանոսյանը կարծում է՝ խաղաղության պամանագիրը հարցերի հանգուցալուծման ճիշտ ուղղությունն է. «Խաղաղության պայմանագիրը ենթադրում է սուվերեն տարածքի վերականգնում»: