Փաշինյանը նոր «ռակիրովկա՞» է պատրաստում. ինչ է սպասվում ՔՊ-ական մարզպետին

Այսօր տեղեկություն տարածվեց, որ Նիկոլ Փաշինյանի որոշմամբ 12 օրով արձակուրդ է տրամադրվել Լոռու մարզպետ Արամ Խաչատրյանին: Օրեր առաջ էլ Խաչատրյանը չէր ներկայացել խորհրդարան՝ բյուջեի քննարկմանը մասնակցելու, ինչը շատերի մոտ հարցերի և կասկածների տեղիք տվեց:

ՏԻՄ վերջին ընտրություններում Լոռու մարզում ՔՊ արձանագրած արդյունքները, մեղմ ասած, գոհացուցիչ չէին Նիկոլ Փաշինյանի համար: Չորս համայնքներից ՔՊ-ն հաղթանակ տարավ միայն երկուսում, ինչը, կարելի է ասել, հերթական ֆիասկոն է: Ուշագրավ է նաև այն փաստը, որ ընտրություններից անմիջապես հետո Փաշինյանը Լոռու մարզպետ Արամ Խաչատրյանին արձակուրդ է ուղարկել, չնայած այն հանգամանքին, որ վերջինս հարաբերականորեն վերջերս էր վերադարձել արձակուրդից:

Սա Խաչատրյանի առաջին ձախողումը չէ: Նախորդ ՏԻՄ ընտրություններում նա պարտվեց Վանաձորում և չկարողացավ ընտրվել համայնքապետի պաշտոնում: Այն ժամանակ էլ շատերի կարծիքով մարզպետի գլխին մութ ամպեր էին կուտակվել: Մամուլը գրել էր Խաչատրյանի Վանաձորյան ՏԻՄ ֆիասկոյից հետո նրա պաշտոնը զբաղեցնելու գլխավոր հավակնորդը պատգամավոր Արփի Դավոյանն է: Ինքը` Դավոյանը, հերքել էր, որ պատրաստվում է զբաղեցնել մարզպետի պաշտոնը, սակայն ինչպես ասում են՝ սա Հայաստանն է, և ոչինչ բացառել հնարավոր չէ: Խաչատրյանը չընտրվեց, փոխարենը համայնքապետ է նշանակվել Արկադի Փելեշյանը, ով առանձնապես չի հաջողում քաղաքի կառավարման գործում, իսկ դա նաև ինչ-որ տեղ մարզպետի թերացումն է: Մինչդեռ Փաշինյանի և ՔՊ-ի ստավկան հենց դրա վրա էր, որ Փելեշյանը իր կիսաքրեական կապերով, ռեսուրսներով կօգնի համայնքը իրենցով անելու գործում, այն էլ Փելեշյանը տապալեց առաջին իսկ քննությունը. անգամ համայնքի բյուջեն է մնում օդից կախված: 

Եվ, իհարկե, երկորդ հավակնորդը Լոռու նախկին մարզպետ Անդրեյ Ղուկասյանն է, ով, կարծես, չի հաշտվում պաշտոնը լքելու մտքի հետ: Նախկին մարզպետ Անդրեյ Ղուկասյանը  ազատվում էր մարզպետարանում Խաչատրյանի կադրերից: Խաչատրյանը մինչ պատգամավոր դառնալը փոխմարզպետ էր, և մամուլը բազմիցս էր անդրադարձել վերջինիս մարզպետ դառնալու ցանկությանը: Այդ ցանկությունը Խաչատրյանն ի կատար ածեց, սակայն այսօր հարվածի տակ է արդեն հենց ինքը: Ընդ որում, Խաչատրյանը մարզպետի պաշտոնը ստանձնելուց հետո ինքն էլ ակտիվորեն ազատվում էր Ղուկասյանի կադրերից:

Ինչպես հասկանում ենք՝ իրադարձությունները ցույց են տալիս, որ Լոռու մարզպետի գլխավերևում իսկապես մութ ամպեր են կուտակվել և չի բացառվում, որ Փաշինյանը որոշի մոտ ապագայում ազատվել վերջինիցս: