Մենք Հայաստանը մեկուսացրել ենք մահմեդական աշխարհի հիմնական սյուներից. Ալիև

«Միևնույն ժամանակ մենք պետք է բացահայտեինք Հայաստանի ագրեսիվ քաղաքականությունը։ Ցավոք սրտի, Հայաստանի կողմից վերահսկվող միջազգային լրատվական ռեսուրսները, ծախված քաղաքական գործիչները, նրանց օտարերկրյա հովանավորները, հայկական լոբբին կարծիք են կազմել, որ Ադրբեջանը ագրեսոր է»։

Այս մասին նախագահ Իլհամ Ալիևն ասել է օկուպացված Շուշիում զինծառայողներին ուղղված իր ելույթում, հայտնում է ԱՊԱ-ն։

Նա նշել է, որ ընդհանուր առմամբ պատերազմի 44 օրերի ընթացքում միջազգային մոտեցումը դրական է եղել. «Ճիշտ է, որոշ հայամետ երկրներ և Հայաստանի հետ սերտ կապեր ունեցող երկրներ փորձեցին քաղաքական որոշ քայլեր ձեռնարկել մեր դեմ։ Բայց ոչ մի արդյունք չտվեցին։ Քանի որ տարիների ընթացքում մենք ստացել ենք միջազգային հզոր աջակցություն։ Մենք մտերիմ հարաբերություններ ենք հաստատել մահմեդական երկրների հետ և կարողացել ենք նրանց բացատրել, որ Հայաստանը ագրեսիվ քաղաքականություն է վարում ոչ միայն մեր, այլ նաև ողջ մահմեդական աշխարհի դեմ։ Ով քանդում է մզկիթները, չի կարող լինել մուսուլմանական երկրների բարեկամը: Մահմեդական երկրների ղեկավարները չեն կարող գրկել նրանց, ովքեր քանդում են մզկիթները, չէ՞: Չի կարելի նրանց գրկել և համբուրել: Սա կեղծավորություն է, սա դավաճանություն է։ Այն այլ անուն չունի։ Այդ իսկ պատճառով մենք Հայաստանը մեկուսացրել ենք մահմեդական աշխարհի հիմնական սյուներից։ Ճիշտ է, մեզ չհաջողվեց լիովին մեկուսացնել նրան, դրա համար այլ պատճառներ կան՝ կեղծավորությունը, որի մասին ես խոսեցի։ Սակայն, ընդհանուր առմամբ, Հայաստանը մահմեդական աշխարհում ճանաչվեց որպես մզկիթներ քանդող ու վիրավորող երկիր, եւ մենք դա արեցինք»։