Նիկոլն ընդդեմ Փաշինյանի. մաս 2

Ընդդիմադիր պատգամավոր Նիկոլ Փաշինյանը դեռևս 2017 թվականին, անդրադառնալով բժշկական հաստատությունների մասնավորեցման խնդրին, հայտարարել էր, որ բազմաթիվ բուժհաստատություններում, մեղմ ասած, կան այնպիսի բժիշկներ, ովքեր իրենց գործից բոլորովին գլուխ չեն հանում, որոշ տեղերում էլ սարքավորումներ չկան: Երբեմն էլ առողջապահական համակարգը կյանքի ու մահի արանքում կանգնած մարդուն ստիպում է համբերել, մինչև որ ընթացակարգերը կկարգավորվեն:

«Ստացվում է՝ ինֆարկտով մարդուն պիտի ասենք՝ սպասի՛ր, Կառավարության որոշմամբ դեռ չես կարող բուժվել։ Սա աբսուրդ է: Միգուցե, զավեշտալի է հնչում, սակայն բազմաթիվ մարդիկ են այդպես մահացել։ Բազմաթիվ հիվանդանոցներ երկրաշարժի ավերակներ են հիշեցնում։ Պետպատվերը մի քանի հիվանդանոցում է կենտրոնացված, որոշ բուժհիմնարկներ էլ վերածվել են օլիգարխների հիվանդանոցների։

Ունենում ենք օազիսներ` ոսկեջրած պատերով։ Կան նաեւ հիվանդանոցներ, որտեղ մասնագետների խնդիր ունենք, ասենք` կոտրված ոսկորը մասսաժ են անում, 4 սանտիմետրանոց  ուռուցքը չեն նկատում։ Մենք դեմ ենք քվեարկելու այս նախագծին», – նշել էր Փաշինյանը:

Ի՞նչ է փոխվել հեղափոխությունից հետո, որի արդյունքում իշխանության եկավ օլիգարխների օբյեկտներից դժգոհող Նիկոլ Փաշինյանը, դժվար է ասել: «Աստղիկ» ԲԿ-ն, որը պատկանում է Սամվել Ալեքսանյանի ընտանիքին, հեղափոխությունից հետո մեկ միլիարդ դրամով ավելի պետական ֆինանսավորում է ստանում: 

4 տարի առաջ Նիկոլ Փաշինյանը մի ուշագրավ հայտարարություն էլ է արել՝ փորձելով ցույց տալ, որ ՀՀԿ-ականների և ժողովրդի միջև կապը կտրվել է և նրանք հանրությանը նայում են միայն իրենց ծառայողական մեքենաների պատուհաններից:

Իսկ սա արդեն վարչապետ Փաշինյանն է, ով ժողովրդին նայում է ոչ միայն ծառայողական մեքենայի պատուհանից, այլ մի բան էլ այդ ժողովրդի կողմը զենք է ուղղում:

Շարքը շարունակելի է...