Ում է մեղադրում Գուրգեն Արսենյանը՝ Հայաստանը ժողովրդագրական աղետի հասցնելու մեջ

Այսօր ԱԺ-ում պատգամավոր Գուրգեն Արսենյանն անչափ ուշագրավ հայտարարություն է արել՝ փաստացի իր իսկ թիմակիցներին մեղադրելով Հայաստանը ժողովրդագրական կոլապսի հասցնելու մեջ:

Ըստ էության, ում է մեղադրում Արսենյանը և ովքեր են պատասխանատու այն բանի համար, որ Հայաստանում իսկապես մահացության թվերը ռեկորդներ են խփում, ծնելիության աճն էլ դանդաղել է: Եթե Արսենյանը չի ցանկանում նշել մեղավորներին, ապա փորձենք մենք դա անել՝ իր փոխարեն:

Եվ այսպես առաջին պատճառը, իհարկե, պատերազմն է, որն էլ սկսվեց այն բանից հետո, երբ Արսենյանի քաղաքական ղեկավար Նիկոլ Փաշինյանը բանակցությունները իր՝ անհասկանալի կետից սկսելուց հետո մտցրեց փակուղի: Արդյունքում՝ ունենք 5000-ից ավել զոհ և ցավով պետք է արձանագրենք, որ մեր զոհված տղաների մեծ մասը երիտասարդ սերնդի ներկայացուցիչներ էին, կարելի է ասել՝ սերունդ ենք կորցրել:

Երկրորդ պատճառը համավարակի դեմ տապալված պայքարն է, որը, անշուշտ, տապալել է Արսենյանի մեկ այլ թիմակից Արսեն Թորոսյանը, ում ապաշնորհ ղեկավարման արդյունքում գրանցվեց 8000-ից ավել մահ: Այդ մահերը թերևս շատ ավելի քիչ կլինեին, եթե համակարգը գործեր պրոֆեսիոնալ, ինչը, ցավոք, տեղի չունեցավ:

Երրորդ պատճառը տնտեսությունն է, որի պատասխանատուն Վահան Քերոբյանն է և որը ոչ մի կերպ չի կարողանում երկնիշ աճ արձանագրել: Հասկանալի է, որ նման իրավիճակում մարդիկ մի քանի անգամ կմտածեն երեխա լույս աշխարհ  բերելուց առաջ, քանի որ առաջ է գալու վերջինիս կերակրելու էլեմենտար խնդիրը:

Հասկանո՞ւմ է արդյոք Գուրգեն Արսենյանը, որ կամա թե ակամա իր քաղաքական թիմակիցներին է մեղադրել ՀՀ-ն ժողովրդագրական աղետի դուռը հասցնելու մեջ...