Էրդողանն ասել է, որ ԹՊԿ-ում «Հյուսիսային Կիպրոսի» դիտորդի կարգավիճակի հարցը լուծված և փակված է

Թուրքիայի նախագահ Ռեջեփ Թայիփ Էրդողանը չորեքշաբթի օրը հայտարարել է, որ միջազգայնորեն չճանաչված «Հյուսիսային Կիպրոսի Թուրքական Հանրապետությանը» (ՀԿԹՀ) Թյուրքական պետությունների կազմակերպությունում (ԹՊԿ) դիտորդի կարգավիճակ տրամադրելու հարցը լուծված և փակված է:

«Մենք չենք պատրաստվում որևէ մեկից թույլտվություն խնդրել այս հարցում: Այս հարցը լուծվել և փակվել է», - ասել է Թուրքիայի ղեկավարը Բալիում «Քսանյակի» (G20) գագաթնաժողովին մասնակցելուց հետո կայացած մամուլի ասուլիսում:

ԹՊԿ-ում Հյուսիսային Կիպրոսին դիտորդի կարգավիճակ շնորհելու մասին հայտնի դարձավ կազմակերպության նոյեմբերի 11-ին Սամարղանդում կայացած գագաթնաժողովում։ Ելույթ ունենալով հանդիպման բացման արարողության ժամանակ՝ Էրդողանն առաջարկել է ՀԿԹՀ-ին հրավիրել կազմակերպություն և նրան դիտորդի կարգավիճակ տալ։ Նույն օրը ավելի ուշ Թուրքիայի արտգործնախարար Մևլութ Չավուշօղլուն Twitter-ի իր էջում գրել էր, որ ՀԿԹՀ-ն ստացել է դիտորդի կարգավիճակ ԹՊԿ-ում։

Ուզբեկստանի արտաքին գործերի նախարար Վլադիմիր Նորովը ԹՊԿ-ի գագաթնաժողովին հաջորդած ճեպազրույցում նշել էր, որ «չի կարող խոսք լինել Հյուսիսային Կիպրոսը որպես անկախ պետություն ճանաչելու մասին»։ Նա հիշեցրել էր, որ ՀԿԹՀ-ն դիտորդի կարգավիճակ ունի Իսլամական համագործակցության և Տնտեսական համագործակցության կազմակերպություններում, ինչպես նաև մասնակցում է Թյուրքական մշակույթի միջազգային կազմակերպության գործունեությանը։