ԱՄՆ-ի տվյալները հաստատում են Վարշավայի եզրակացությունները, որ Ուկրաինայի հրթիռն է ընկել Լեհաստանում. Պենտագոնի ղեկավար

ԱՄՆ պաշտպանության նախարար Լլոյդ Օսթինը հայտարարել է, որ ԱՄՆ կառավարությանը հասանելի տեղեկությունը հաստատում է Լեհաստանի իշխանությունների եզրակացությունը, ըստ որի՝ ուկրաինական հակաօդային պաշտպանության հրթիռն ընկել է Լեհաստանի տարածքում։ Նրա խոսքերը հայտնում է ՏԱՍՍ-ը։

Մեկնաբանելով Ուկրաինայի նախագահ Վլադիմիր Զելենսկու խոսքերը, թե նշված հրթիռը ուկրաինական չէ, Օսթինը նշել է, որ Լեհաստանի կողմից իրականացվող հետաքննությունը դեռ շարունակվում է։

«Մենք ամեն կերպ օգնում ենք։ Մեր փորձագետներն այնտեղ են, նրանք օգնում են Լեհաստանի ղեկավարությանը»,- ասել է նա։

Օսթինը նաեւ ընդգծել է, որ ԱՄՆ-ն վստահ է Լեհաստանի՝ հետաքննությունը պատշաճ կերպով անցկացնելու կարողության մեջ, եւ քանի դեռ այն չի ավարտվել, «բոլորի համար վաղաժամ է եզրակացություններ անելը»։

Ավելի վաղ Սպիտակ տան Ազգային անվտանգության խորհրդի պաշտոնական ներկայացուցիչ Ադրիեն Ուոթսոնը հայտարարել էր, որ ԱՄՆ-ն Ռուսաստանին է պատասխանատու համարում Լեհաստանում հրթիռային միջադեպի համար՝ անկախ հետաքննության արդյունքներից։