Նիկոլն ընդդեմ Փաշինյանի. մաս 3

Հեղափոխությունից հետո շատ հաճախ բախվում ենք մի իրավիճակի հետ, երբ վարչապետ Փաշինյանի շուրթերից լսում ենք այնպիսի հայտարարություններ, որոնք լրջորեն հակասում են իր իսկ խոսքերին, որոնք վերջինս հնչեցրել է ընդդիմադիր պատգամավորի կարգավիճակում:

Բոլորս էլ քաջ հիշում ենք, թե ինչ էպիտետներով էր Փաշինյանը կնքում ՀՀԿ ֆինանսական կտուրը հանդիսացող Սամվել Ալեքսանյանին: 2012-ի մարտին, դեռևս որպես «Հայկական ժամանակ» օրաթերթի գլխավոր խմբագիր, Նիկոլ Փաշինյանը պահանջել էր, որ Սամվել Ալեքսանյանին զրկեն պատգամավորական մանդատից: Նա նամակ էր հղել ԱԺ նախագահ Սամվել Նիկոյանին՝ նշելով, որ գործարար պատգամավոր Սամվել Ալեքսանյանն ԱԺ 4-րդ գումարման նստաշրջանում կեսից ավելին բացակայել է, ինչը ենթադրում է, որ նա պետք է զրկվի մանդատից: Նիկոլ Փաշինյանը պահանջել էր ներկայացնել այն հիմքերը, որոնց հիման վրա Սամվել Ալեքսանյանի բացակայությունները հարգելի են համարվել: 2012թ. ապրիլին արդեն Փաշինյանը պահանջում էր, որ ուժը կորցրած համարեն Սամվել Ալեքսանյանի գրանցումը՝ որպես պատգամավորության թեկնածու: Արդեն 2016-ին Փաշինյանը ՀՔԾ էր դիմում բացահայտելու Ալեքսանյանի մասնակցությամբ հանցավոր սխեման:

Հեղափոխությունից հետո Նիկոլ Փաշինյանը մոռացել է իր կողմից հնչեցրած բոլոր մեղադրանքները: Այժմ նրա և Սամվել Ալեքսանյանի հարաբերություններն ավելի քան ջերմ են:

Բանը հասել է անգամ նրան, որ Նիկոլ Փաշինյանը կառավարության նիստի ընթացքում ոչ միայն արտոնություններ է շռայլում Սամվել Ալեքսանյանին, այլ նաև գովազդում  է վերջինիս բիզնեսը: