Փաշինյանն է հանրությանը հրամցնում ադրբեջանական թեզերն ու պահանջները. Գեղամ Մանուկյան

Այս իշխանությունը չորս տարի շարունակ գործում է «Օվերտոնի պատուհանի» սկզբունքով։ Հայտնի սկզբունք է, երբ որևէ թեմա տաբու է համարվում, չի խոսվում դրա մասին, առաջին անգամ խոսք է բացվում, քննադատում են, հարվածում են, բայց սկզվում է քննարկվել, հետո՝ գուցե մեկը մտածի, որ ճիշտ է ու այդպես ժամակի ընթացքում դառնում է հանրային ընկալելի հարց։ Նույնը վերաբերում է «անկլավ» կոչվածներին։ Այս մասին Խորհրդարանական ճեպազրույցների ընթացքում ասաց ԱԺ «Հայաստան» խմբակցության պատգամավոր Գեղամ Մանուկյանը՝ անդրադառնալով Փաշինյանի՝ անկլավների վերաբերյալ հայտարարությանը, թե Ադրբեջանը մեզ մեղադրում է ադրբեջանական տարածքներ օկուպացնելու մեջ՝ նշելով, որ եթե դուրս գան, մենք էլ պետք է դուրս գանք և, պատրաստ է լսել Ադրբեջանին։

«2021թ օգոստոսին ԱԺ-ում իշխանական պատգամավորներից մեկը՝ տավուշեցի, չբացառեց, քննադատեցին և այլն, բայց խոսույթում արդեն կար, Նիկոլ Փաշինյանն էլ չխոսեց, չխոսեց, հերքեց, մեկ էլ՝ մի օր խոսքի մեջ ասաց։ Ուրիշ վտանգավոր տերմին օգտագործեց՝ խոսելով Նռնաձորի, Մեղրիի մասին։ Ինքն է հանրությանն ադրբեջանական թեզերն ու պահանջները հրամցնում, պատահական չէ այն տարածքը, թիվը, ծավալը, մակերեսը ՀՀ-ի՝ 29.800 քառակուսի կմ, ինչը վերջին շրջանում շրջանառության մեջ մտավ։ Նայեք Խորհրդային Հայաստանի քարտեզին, կպատկերացնեք՝ ինչի մասին է խոսքը։ Դա մինչև 1991թ քարտեզների մասին է, չի խոսում չէ՞ Արծվաշենի մասին։ Ինքը շրջանառության մեջ է դնում ադրբեջանական թեզերը»,- ասաց Մանուկյանը։

Անդրադառնալով Նիկոլ Փաշինյանի երեկվա հայտարարությանը, համաձայն որի՝ Հայաստանն առաջարկել է Ադրբեջանին՝ խաղաղության շրջանակային պայամանագիր ստորագրել՝ Մանուկյանը նշեց, որ դժվար է մեկնաբանել, որովհետև մեկնաբանում են գիծ ունեցող մարդու հայտարարություններ.«Հիմա, եթե շրջանակային պայմանագրի մասին մեկնաբանեմ, ճիշտ այս ժամին կառավարության նիստին Փաշինյանը հայտարարի, որ Ադրբեջանը ֆաշիստական մեկնաբանություն է, ցեղասպանում է ժողովրդին, 180 աստիճանով փոխի, ինչը մեկնաբանեմ»։