Տիգրան Ավինյանի նախընտրական PR-ը մնացել է կառավարության «ուսերին» (տեսանյութ)

Կառավարության այսօրվա նիստը բավական ուշագրավ էր, քանի որ աչքի էր ընկնում Երևանի քաղաքապետի ՔՊ-ական թեկնածուի՝ Տիգրան Ավինյանի անզուսպ և վատ քողարկված փիառով: 

Երևանի փոխքաղաքապետ Տիգրան Ավինյանը կառավարության նիստում անդրադարձել է մայրաքաղաքի վթարային շենքերի խնդրին։ Ուշագրավ է, որ հարցին անդրադառնում է նա և ոչ թե քաղաքապետ Հրաչյա Սարգսյանը ում եռանդը վերջերս զգալիորեն մարել է Ավինյանի նախընտրական ակտիվության ֆոնին: Ավինյանն ու Փաշինյանն էլ իրենց հերթին հարց ու պատասխանի միջոցով, այսպես ասած՝ պասերով փորձում էին տպավորություն ստեղծել, որ մինչ այս ոչ մի քաղաքապետի ձեռք այդպես էլ չի հասել վթարային շենքերի խնդիրը լուծելուն և ահա հրաշք՝ դրանով այսուհետ կզբաղվի Տիգրան Ավինյանը: Ակնհայտ է, որ այս քայլը և ընդհանրապես կառավարության նիստին Ավինյանի ներկայանալը ամբողջովին տեղավորվում է վերջինիս նախընտրական փիառ արշավի տրամաբանության մեջ: Կառավարությունը փաստորեն միացել է այդ արշավին և օգտագործում է նիստերը այդ արշավը իրագործելու նպատակով:

Ըստ էության` փորձ է արվում ստեղծվել տպավորություն, որ բոլոր խոշոր պռոյեկտները, ինչպիսիք օրինակ Մետրոյի նոր կայարանի կառուցումն է, կամ վթարային շենքերի հարցերի կոմպլեքս լուծումը՝ կապվում են միայն ու միայն Տիգրան Ավինյանի հետ և բնական է, որ դրանք ավարտին հասցնելու համար ՔՊ թեկնածուին պետք է գալու երևանցիների քվեն: Սակայն, եթե փիառը արդեն իսկ այսքան ցայտուն է, նշանակում է ՔՊ-ում լուրջ կասկածներ ունեն Երևանի քաղաքապետի ընտրություններում իրենց հաղթանակի հավանականության հետ կապված:

Հիշեցնենք, նման քաղաքական ֆիասկո գրանցվեց վերջերս Ալավերդիում, երբ ՔՊ-ական թեկնածու Արեն Մկրտչյանը մի քանի ամիս շարունակ քարոզարշավ իրականացնելուց, անգամ համայնքապետին բնորոշ գործառույթներ յուրացնելուց հետո էլ ՏԻՄ ընտրությունների ժամանակ պարտություն կրեց: