Կոտայքի մարզում մսամթերք տեղափոխող ավտոմեքենան մխրճվել է ավազ տեղափոխող ЗИЛ-ի հետնամասի մեջ

Այսօր` նոյեմբերի 17-ին, խոշոր ավտովթար է տեղի ունեցել Կոտայքի մարզում։ Ժամը 11։15-ի սահմաններում Երևան-Սևան ավտոճանապարհի 40 կմ հատվածում բախվել են JAC մակնիշի ավտոմեքենան և ավազով բաձված ЗИЛ մակնիշի բեռնատարը։

Ինչպես դեպքի վայրից հայտնում է Shamshyan.com-ը, վթարի հետևանքով JAC-ի վարորդը արգելափակվել է ավտոմեքենայի խցիկում։ Օպերատիվորեն ժամանել են Արտակարգ իրավիճակների նախարարության Փրկարար ծառայության Հրազդանի թիվ 44 հրշեջ-փրկարարական ջոկատից 1 մարտական հաշվարկ։ Վ

արորդին ավտոմեքենայից դուրս են բերել հրշեջ-փրկարաները, քաղաքացիներն ու Ճանապարհային ոստիկանության 2-րդ սպայական գումարտակի 3-րդ վաշտի 2-րդ դասակի ծառայողները։ Օպերատիվ են գործել «Հրազդան» բժշկական կենտրոնի բժիշկների հերթապահ խումբը, ովքեր վիրավորին մինչև հիվանդանոց տեղափոխելը, տեղում առաջին բուժօգնությունն են ցուցաբերել։

Վիրավորին հիվանդանոց է ուղեկցել ՃՈ 2-րդ սպայական գումարտակի 3-րդ վաշտի հրամանատար Արթուր Պետրոսյանը։ Այս պահին տեղում ուժեղացված ծառայություն են կատարում նույն վաշտի 2-րդ դասակի ծառայողները՝ դասակի հրամանատար Սարգիս Բագրատյանի գլխավորությամբ, քանի որ ավտոմեքենան մասամբ հայտնվել է ճանապարհի երթևեկելի գոտում։

Վթարի մասին ՃՈ 1-77 օպերատիվ կառավարման կենտրոնի պատասխանատու հերթապահ Միհրան Միրզոյանը տեղեկությունը փոխանցել է Հայաստանի քննչական կոմիտեի Կոտայքի մարզային քննչական վարչություն, որտեղից ժամանել է քննչական խումբը՝ քննիչ Ա․ Ավետիսյանի գլխավորությամբ, ում կողմից նախաձեռնվել է վարույթ։

Դեպքի վայր են ժամանել նաև ոստիկանության Հրազդանի բաժնի հերթապահ խումբը՝ օրվա պատասխանատու հերթապահի գլխավորությամբ։  Ոստիկանությունն ու քննչական բաժինը պարզում են վիրավոր վարորդի և ЗИЛ-ի վարորդի ինքնությունը։