Հյուսիսային Կորեայում առաջին անգամ հրապարակվել է Կիմ Չեն Ընի դստեր լուսանկարը

Հյուսիսային Կորեայի լրատվամիջոցներն առաջին անգամ հրապարակել են երկրի առաջնորդ Կիմ Չեն Ընի դստեր լուսանկարները։ Հարավկորեական Yonhap գործակալության փոխանցմամբ՝ Կիմ Չեն Ընը դստեր հետ մեկ օր առաջ մասնակցել է միջմայրցամաքային բալիստիկ հրթիռի փորձարկմանը։

Հյուսիսային Կորեայի Կենտրոնական լրատվական գործակալությունը (KCNA) հաղորդել է, որ Կիմ Չեն Ընը ուրբաթ երեկոյան ստուգել է Փհենյանի միջազգային օդանավակայանում երկրի ամենամեծ Hwaseong-17 բալիստիկ հրթիռի արձակումը: Կիմը մեկնարկի պահին եղել է «իր սիրելի դստեր և կնոջ հետ», հայտնում է KCNA-ն: Հրապարակված լուսանկարներում նրա դուստրը (որը կարծես դեռահաս է), սպիտակ ձմեռային բաճկոնով և սև տաբատով, Կիմի հետ կանգնած է հրթիռի դիմաց, որը գտնվում է արձակիչի վրա։ 

Տեղադրված լուսանկարները Կիմ Չեն Ընի դստեր գոյության առաջին պաշտոնական վկայությունն են։ Մինչ այս Հյուսիսային Կորեան չէր հաստատել, որ Կիմը երեխաներ ունի։ Հարավային Կորեայի հետախուզությունն ավելի վաղ հայտնել էր, որ Կիմ Չեն Ընը և Ռի Սոչ Ջուն ամուսնացել են 2009 թվականին և ունեն երկու դուստր և մեկ որդի՝ ծնված համապատասխանաբար 2010, 2013 և 2017 թվականներին։

Yonhap-ը նաև մեջբերում է ամերիկացի բասկետբոլիստ Դենիս Ռոդմանի հիշողությունները, ով 2013 թվականին Փհենյանում այցելել է Կիմ Չեն Ընին։ Ռոդմանը պնդել է, որ իր գրկում է պահել Կիմի փոքր դստերը՝ Չժու Էին:

Հարավկորեացի վերլուծաբաններն ասում են, որ Կիմի և նրա ընտանիքի լուսանկարները ցույց են տալիս այն կարևորությունը, որ Հյուսիսային Կորեայի ռեժիմը տալիս է զորավարժություններին:

«Սա ցույց է տալիս նրա վստահությունը հրթիռային փորձարկումների հաջողության նկատմամբ, ինչը ևս մեկ անգամ պետք է ընդգծի ազգային անվտանգության թեմայի կարևորությունը», - ասել է Հյուսիսային Կորեայի հետազոտությունների համալսարանի նախագահ Յան Մուջինը:

Ինչ վերաբերում է միջմայրցամաքային բալիստիկ հրթիռի արձակմանը, ապա հյուսիսկորեական պաշտոնական լրատվամիջոցի տեղեկություններով՝ այն հաջող է անցել։ «Փհենյանի միջազգային օդանավակայանում գործարկված ICBM-ի նոր տեսակը՝ Hwaseong-17, թռել է 4135 վայրկյան, թռիչքի հեռահարությունը կազմել է 998 կմ, իսկ առավելագույն բարձրությունը՝ 6040,9 կմ։ Կիմ Չեն Ընը տեղում վերահսկում էր հրթիռի փորձնական արձակումը»,- հաղորդում է ՏԱՍՍ-ը։