Բելգրադը պատրաստակամություն է հայտնել պաշտպանել սերբերին Կոսովոյում

Սերբիայի զինված ուժերը պատրաստ են ձեռնարկել բոլոր հնարավոր միջոցները Կոսովոյում և Մետոխիայում սերբերին պաշտպանելու համար։ Այս մասին հայտարարել է երկրի պաշտպանության նախարար Միլոշ Վուչևիչը, փոխանցում է РИА Новости-ն։

«Եթե Սերբիայի նախագահը հրամայի, ապա բանակը բոլոր միջոցները կձեռնարկի Կոսովոյում և Մետոխիայում սերբերին պաշտպանելու համար»,- ասել է նախարարը։

Միևնույն ժամանակ, Վուչևիչն ընդգծել է, որ բանակցություններն ամեն դեպքում նախընտրելի են հակամարտությունից, և «ավելի լավ է խոսել հազար օր ու ժամ և նայել բանակցողների մռայլ դեմքերին, քան մեկուկես ժամ անցկացնել խրամատներում»:

Ավելի վաղ հաղորդվել էր, որ Սերբիայի նախագահ Ալեքսանդր Վուչիչի և Կոսովոյի չճանաչված Հանրապետության վարչապետի միջև բանակցություններն ավարտվել են անհաջողությամբ։

Սերբիայի նախագահն ասել է, որ իրավիճակը տարածաշրջանում դարձել է ամենաբարդը վերջին 10 տարվա ընթացքում։ Նրա խոսքով՝ ինքը համաձայնության գալու հույս չունի, բայց չի ցանկանում, որ որեւէ մեկը մտածի, թե Սերբիան չի ցանկանում մասնակցել բանակցություններին։