Լեհաստանում արգելել են հեռախոսները լիցքավորել գրասենյակներում

Լեհաստանի տեղական իշխանությունները պահանջել են դեկտեմբերի 1-ից 10%-ով կրճատել էլեկտրաէներգիայի սպառումը։ Այս ֆոնին արգելվել է գրասենյակներում լիցքավորել հեռախոսները և տաքացնել սենյակները +19°C-ից բարձր: Այս մասին հայտնում է Rzeczpospolita թերթը։

Այս միջոցը ձեռնարկվել է երկրում էներգետիկ ճգնաժամին դիմակայելու համար։

Նշվում է, որ ստանդարտին չհամապատասխանելու համար պաշտոնյաներին կարող է սպառնալ մինչև 20 հազար զլոտի (մոտ 4,5 հազար դոլար) տուգանք:

«Բջջային հեռախոսները լիցքավորելու արգելքը, սառնարանների և էլեկտրական թեյնիկների քանակի կրճատումը կամ աշխատասենյակների մաքրման սահմանափակումը այն ուղիներից են, որով տեղական իշխանությունները կրճատում են էլեկտրաէներգիայի սպառումը, ինչը նրանցից պահանջվում է վաղվանից»,- գրում է թերթը։

Հրատարակության տվյալներով՝ Սուրբ Ծննդին էլեկտրաէներգիայի խնայողության են սպասում նաև Լեհաստանի քաղաքները։ Այսպիսով, Սոսնովեցի քաղաքապետն ասել է, որ այս տարի տոնական լուսավորությունը ավելի քիչ կմիացվի, ենթադրաբար՝ գիշերը կանջատվի։