Գյումրիում խոստացված ազատ տնտեսական գոտին կյանքի չի կոչվում. Civilnet․am

Ավելին քան երեք տարի առաջ՝ 2019-ի օգոստոսի 29-ին, կառավարությունը որոշեց Շիրակի մարզի Գյումրի քաղաքում ազատ տնտեսական գոտի (ԱՏԳ) ստեղծել, որը պետք է զբաղվեր լոգիստիկ և արտադրական գործունեությամբ։ ԱՏԳ-ի ժամկետը սահմանվեց 40 տարի և ճանաչվեց ԱՏԳ-ի կազմակերպիչ ընկերությունը, հաղորդում է Civilnet.am-ը:

Ազատ տնտեսական գոտիները ստեղծվում են ներդրումների ներգրավման, նոր աշխատատեղերի ստեղծման, արտահանման խթանման միջոցով երկրի տնտեսությունը զարգացնելու նպատակով։ ԱՏԳ-ի կազմակերպիչ և շահագործող ընկերություններն ազատվում են բոլոր տեսակի հարկերից՝ բացառությամբ եկամտային հարկից։

Գյումրում ԱՏԳ-ի նախագծի հեղինակ և կազմակերպիչ ճանաչվել էր «Եվրասիական լոգիստիկ պարկ ազատ տնտեսական գոտի» ՍՊԸ-ն, որը կառավարությանը ներկայացրած բիզնես ծրագրով խոստացել էր առաջիկա 10-12 տարիների ընթացքում կառուցել 320 հեկտար տարածքով ազատ տնտեսական գոտի, որն ուղղակի և անուղղակի ավելի քան 56 հազար աշխատատեղ պետք է ապահովեր, ներգրավեր մոտ 540 միլիոն դոլարի արտասահմանյան ուղղակի ներդրումներ և այլն։

Ծրագիրը պետք է իրագործվեր փուլ առ փուլ․ առաջին փուլով 3 տարվա ընթացքում պետության կողմից տրամադրվող 30 հեկտար տարածքի վրա պետք է շինարարություն իրականացվեր և գործարկվեր ազատ տնտեսական գոտին, ընկերությունը 2023-ի դրությամբ մոտ 100 աշխատակից պետք է ունենար։

Ընկերությունը իսրայելական է

«Եվրասիական լոգիստիկ պարկ ԱՏԳ» ընկերությունը, համաձայն պետռեգիստրի տվյալների, ստեղծվել է 2017-ի սեպտեմբերին, բաժնետերերը մշտապես եղել են Իսրայելի քաղաքացիներ և ընկերություններ։

Ընկերության գործունեությունը դադարեցված է, աշխատողներ չկան

Այսօր արդեն Էկոնոմիկայի նախարարության կայքում Գործող ազատ տնտեսական գոտիների ցանկում Գյումրու ԱՏԳ-ն բացակայում է, իսկ համացանցում ԱՏԳ-ի և կազմակերպիչ ընկերության մասին նոր հիշատակումներ չկան։ Ընկերությունը բացակայում է նաև ԱՏԳ-ում շահագործողներին տրվող թույլտվության ռեեստրում։

Համաձայն Պետեկամուտների կոմիտեի ռեգիստրի՝ «Եվրասիական լոգիստիկ պարկ ԱՏԳ» ընկերությունը, որը արդեն իսկ պետք է կառուցած և գործարկած լիներ ԱՏԳ-ի մի մասը, ներկայում դադարեցրել է իր գործունեությունը։

Google Earth-ի արբանյակային լուսանկարներից պարզ է դառնում, որ ԱՏԳ-ի համար նախատեսված տարածքում որևե հողային աշխատանքներ չեն կատարվել։

#CivilNetCheck-ը կապ հաստատեց ընկերության տնօրեն Հայկ Մաղաքյանի հետ, որը հայտնեց, որ ընկերության գործունեությունը դադարեցված է, իսկ ծրագիրը կասեցվել է կորոնավիրուսի համավարակի պատճառով։ Ըստ Մաղաքյանի՝ ծրագիրը այլևս չի նախատեսվում գործարկել։

«Պատճառը ավելի շուտ կորոնավիրուսի հետ էր կապված։ 2020-ի սկզբից արդեն, երբ պիտի աշխատանքները պլանավորեինք, համավարակը սկսվեց և շարժը կանգնեց, արդեն հնարավոր չէր գնալ-գալ, մեր դրսի գործընկերները չէին կարողանում գալ։ Քննարկումները կառավարության հետ կանգնեցին, հետո պատերազմը սկսվեց։ Ծրագրի մեկնարկ չի նախատեսվում»,- պարզաբանեց Մաղաքյանը։

Էկոնոմիկայի նախարարությունից հայտնեցին, որ կառավարության համապատասխան որոշումից հետո ընկերության ներկայացրած պատճառաբանությունների հետևանքով պայմանագիրը չի կնքվել: «Ներկայում քննարկվում է ստեղծված գոտու հետագա կարգավիճակի հարցը»,- նշված է նախարարության գրության մեջ: