Հոնկոնգից մի քանի հարյուր ոստիկաններ գաղտնի կերպով դիտել են գործով մեղադրյալի մասնակցությամբ սեքս-տեսագրությունը

Հոնկոնգից մի քանի հարյուր իրավապահներ անօրինական կերպով դիտել են պոռնո տեսանյութ, որում գործով կասկածյալը սեքսով է զբաղվում, հայտնում է VICE-ը։ 

Ըստ աղբյուրի՝ անվտանգության հարյուրավոր աշխատակիցներ, շրջանցելով օրենքը, հասանելիություն են ստացել պոռնո տեսանյութին, որը պատկերում էր 36-ամյա կնոջը և նրա սիրելիին։ Վերջիններս հասարակական բարոյականությունը վիրավորելու գործով մեղադրյալներ են․ քաղաքի բնակչուհին ապակեպատ պատշգամբում սեռական հարաբերություն է ունեցել 30-ամյա տղամարդու հետ, համապատասխան կադրերը հայտնվել են համացանցում։ Այժմ հանցագործներին սպառնում է մինչև յոթ տարվա ազատազրկում:

Այսպիսով, լրագրողները պարզել են, որ հարյուրավոր ոստիկաններ օգտագործել են ներքին ցանցը՝ անօրինական կերպով սեքս-տեսանյութերին հասանելիություն ստանալու համար։ Ավելին, նրանք միմյանց ուղարկել են գործը, ինչպես նաև ձերբակալությունից հետո կասկածյալի լուսանկարը։

Իրավապահ մարմինները լրատվամիջոցներին պարզաբանել են, որ գերատեսչության աշխատակիցների գործողությունները քրեական պատասխանատվության ենթակա չեն, քանի որ նրանք պարզապես «հետաքրքրասիրություն» են ցուցաբերել։ Մեկ այլ աղբյուր հավելել է, որ ոչ ոք չի պատժվել, քանի որ օրինախախտները չափազանց շատ են եղել, այդ թվում՝ բարձրաստիճան սպաներ։ Իր հերթին Հոնկոնգի ոստիկանության ներկայացուցիչը հայտնել է, որ ձեռնարկվել են անհրաժեշտ կարգապահական միջոցներ, սակայն մանրամասներ չի հայտնել։

Հոնկոնգում կանանց նկատմամբ սեռական բռնության դեմ պայքարի ասոցիացիայի ղեկավար Լինդա Վոնգը շեշտել է, որ 2021 թվականի դրությամբ օրենքը քրեականացնում է լուսանկարների կամ տեսանյութերի հրապարակումն առանց դրանցում պատկերվածների համաձայնության։ Վոնգը ցնցված է ոստիկանների պահվածքից, որոնք վերապատրաստվել են նոր կանոններով։