ԱՀ անվտանգության խորհրդի հայտարարությունը՝ Լաչինի միջանցքում ադրբեջանական հենակետ դնելու մասին

Ի պատասխան զանգվածային լրատվամիջոցներում շրջանառվող շահարկումների՝ կապված Արցախի Հանրապետության Անվտանգության խորհրդի քարտուղար Վիտալի Բալասանյանի կողմից Փառուխում, Աղավնոյում և այլուր անցկացված «բանակցությունների» հետ, հայտնում ենք հետևյալը։

ՀՀ վարչապետի, ՌԴ և Ադրբեջանի նախագահների 2020 թվականի նոյեմբերի 9-ին ընդունած եռակողմ հայտարարության 2-րդ և 6-րդ կետերով սահմանվել է համապատասխանաբար Աղդամի, Լաչինի ու Քելբաջարի շրջանների վերադարձ Ադրբեջանին՝ կոնկրետ ժամկետների ընթացքում։

Վերը նշվածից հետևում է, որ Արցախի Հանրապետության Անվտանգության խորհրդի քարտուղար Վիտալի Բալասանյանը որևէ առնչություն չունի Լաչինի, Աղդամի կամ այլ շրջանների տարածք Արցախի Հանրապետության իրավազորությունից դուրս բերելու գործընթացի հետ։

Ավելին՝ Անվտանգության խորհրդի քարտուղար Վիտալի Բալասանյանը Փառուխի կամ այլ գյուղերի մերձակայքում տեղակայված որևէ մարտական դիրք դուրս բերելու ոչ մի լիազորություն, առավել ևս ցանկություն չունի և չի ունեցել։

Միևնույն ժամանակ տեղեկացնում ենք, որ ՀՀ վարչապետի, ՌԴ և Ադրբեջանի նախագահների եռակողմ Հայտարարության 3-4-րդ կետերով նախատեսվել է Լեռնային Ղարաբաղի շփման գծի, ինչպես նաև Լաչինի միջանցքի երկայնքով ՌԴ խաղաղապահ զորակազմի ծավալում՝ զուգահեռաբար հայկական զինված ուժերի դուրսբերումով։ 

Այս կապակցությամբ հարկ ենք համարում իրազեկել, որ համաձայն «Լեռնային Ղարաբաղի հակամարտության գոտում խաղաղապահ գործողության անցկացման մանդատով» սահմանվող կանոնների՝ իր պատասխանատվության գոտում իրականացվող ճանապարհային երթևեկության վերահսկողության շրջանակներում խաղաղապահ զորակազմն իրավունք ունի տեղակայել շուրջօրյա գործող հսկիչ-անցագրային կետեր, որոնք համալրված են անձնակազմով և համապատասխան տեխնիկական միջոցներով, որոնք, մասնավորապես, թույլ են տալիս իրականացնել մշտական տեսա- և այլ դիտարկումներ ու զննություն՝ խաղաղապահ զորակազմի պատասխանատվության գոտի քաղաքացիական բնակչության մուտքը և/կամ ելքն, առանց արգելված իրերի, անխոչընդոտ ապահովելու նպատակով։

Հաշվի առնելով վերոգրյալը, լրատվական միջոցներին հորդորում ենք զերծ մնալ էժանագին, ոչնչով չհիմնավորված մանիպուլյացիաներից և հանրությանը մատուցել արժանահավատ տեղեկատվություն։