Քոչարյանն ընդդեմ Փաշինյանի գործով դատաքննությունն ավարտվեց․ հայտնի է, թե երբ կհրապարակվի վճիռը

Երևան քաղաքի ընդհանուր իրավասության դատարանը (Քանաքեռ նստավայր)՝ նախագահությամբ դատավոր Սերգեյ Սահակյանի, այսօր շարունակեց լսել քաղաքացիական գործն ըստ հայցի ՀՀ երկրորդ նախագահ Ռոբերտ Քոչարյանի ընդդեմ Նիկոլ Փաշինյանի և Հայաստանի Հանրապետության։ 

Դատարանն ավարտեց Ռ․ Քոչարյանի ներկայացուցիչ Հայկ Ալումյանի ներկայացրած ապացույցների հետազոտումը։ 
 
Հիշեցնենք, որ նախորդ նիստին Ալումյանը, որպես ևս մեկ ապացույց, դատարանին է ներկայացրել 2021 թ. մարտի 1-ին Երևանի Հանրապետության հրապարակում ՀՀ վարչապետ Նիկոլ Փաշինյանի ելույթը։ Այդ ժամանակ Ռ․ Քոչարյանը դեռևս մեղադրվում էր 300․1 հոդվածով, և Ալումյանը գտնում է, որ Փաշինյանն այդ ելույթով խախտել է նախագահի անմեղության կանխավարկածը։

Դատարանին ներկայացվեց նաև հայցվոր կողմի՝ 8 էջից կազմված դիրքորոշումը, որի դեմ պատասխանող կողմն իր առարկությունները հայտնեց։ 

Դատաքննությունն ավարտվեց, վճիռը կրապարակվի 2023 թ․ հունվարի 10-ին։