Սա ցույց է տալիս, որ Ադրբեջանը տարածաշրջանում արդեն ոչ թե սպառնալիք է, այլ վտանգ. Արա Ղազարյան

Սրանք ցեղասպանության նախապատրաստական քայլերն են, գոնե էթնիկ զտման հստակ քայլեր են, որովհետեւ հասկանում ենք, որ այնտեղ բնապահպաններ չեն։ Այս մասին այսօր՝ դեկտեմբերի 16-ին, հրավիրված ասուլիսին ասաց միջազգային իրավունքի մասնագետ Արա Ղազարյանը։

«Ճանապարհին մնացել են մարդիկ, որոնք հաշմանդամություն ունեն, մնացել են երեխաներ, որոնք զրկված են կրթությունից, սոցիալ-մշակութային-տնտեսական իրավունքներն են խախտված. այսինքն՝ մենք ունենք բլոկադա, իսկ դա պատերազմի նախապատրաստման ակտ է։ Սա արդեն ներգրավում է ոչ միայն մարդու իրավունքի կոնցեպտը, այլ նաեւ ցույց է տալիս, որ պետությունը տարածաշրջանում արդեն ոչ սպառնալիք է, այլ վտանգ։ Սովորական տեղաշարժի իրավունքը վերցնում ենք, միացնում ենք մարդու իրավունքների բազմաթիվ հայեցակարգեր եւ դա դնում ենք ավելի լայն օղակով, եւ տեսնում ենք, որ դա բլոկադա է»,- նշեց նա։

Ավելի վաղ հայտնել էր, որ դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։ Ավելի քան 1100 մարդ, որից 270-ը անչափահաս, չի կարողանում վերադառնալ սեփական տները։

Դեկտեմբերի 13-ից ադրբեջանական կողմն անջատել էր նաեւ Արցախի գազամատակարարումը՝ ջեռուցման սեզոնին ստեղծելով լուրջ դժվարություններ բնակչության համար։