Հնդկաստանում գրեթե 80 մարդ է մահացել կեղծված ալկոհոլ օգտագործելու հետևանքով

Հնդկաստանի Բիհար նահանգում հաշված օրերի ընթացքում մոտ 80 մարդ է մահացել կեղծված ալկոհոլի պատճառով։ Այս մասին հայտնում է տեղական WION հեռուստաալիքը։

ԶԼՄ-ների տվյալներով՝ նրանք կեղծված լիկյոր են խմել: Մահվան դեպքերի ամենամեծ թիվը գրանցվել է Սարան թաղամասում, որտեղ մահացել է 74 մարդ, հարևան Սիվան թաղամասում՝ ևս վեց, Բեգուսարայում՝ ևս երկու մարդ։ 

Մարդու իրավունքների ազգային հանձնաժողովը ողբերգության հետ կապված ծանուցումներ է ուղարկել Բիհարի կառավարությանը և նահանգի ոստիկանության պետին։

Սիվան շրջանի շրջանային դատավորն ասել է, որ կառավարությունը հետաքննություն է սկսել մահվան դեպքերի վերաբերյալ: «Մենք նաև խուզարկություններ ենք անցկացնում տարածքում՝ խմիչքի առքուվաճառքով զբաղվողներին ձերբակալելու համար», - ասել է նա:

Ալկոհոլի վաճառքի և արտադրության արգելքը Բիհարում ուժի մեջ է մտել 2016 թվականից, որից հետո նահանգում ձևավորվել Է ալկոհոլի, այդ թվում՝ կեղծ ալկոհոլի անօրինական շուկա: Տեղական ԶԼՄ-ների տվյալների համաձայն՝ անցյալ տարվա ընթացքում անորակ ոգելից խմիչք օգտագործելու հետևանքով նահանգում մահացել Է շուրջ 100 մարդ: Հնդկաստանի իշխանությունները ձգտում են կրճատել բնակչության կողմից ալկոհոլի օգտագործումը՝ 70%-ի հասնող մեծ հարկեր սահմանելով կամ սահմանափակումներ մտցնելով ալկոհոլի վաճառքի նկատմամբ։ Երկրի բնակչությունն օգտագործում է կոկոսից, շաքարեղեգից, հնդկական ընկույզից պատրաստված տնային ինքնաթոր օղի, որը հաճախ արտադրվում է տեխնոլոգիական խախտումներով և հանգեցնում թունավորման կամ մահվան։