Թաիլանդի թագավորն ու թագուհին վարակվել են կորոնավիրուսով

Թաիլանդի թագավորն ու թագուհին վարակվել են COVID-19-ով, սակայն առայժմ միայն մեղմ ախտանիշներ ունեն, հաղորդում է AP-ն՝ վկայակոչելով թագավորական պալատի հայտարարությունը:

Բժիշկները բուժում են նշանակել 70-ամյա Մահա Վաջիրալոնգկորնին ու 44-ամյա թագուհի Սութհիդային եւ խնդրել են նրանց որոշ ժամանակ ձեռնպահ մնալ իրենց պարտականությունների կատարումից, ասվում է Թագավորական պալատի բյուրոյի հայտարարության մեջ:

Ավելի վաղ ամուսիններն այցելել էին արքայադուստր Բաջրակիտյաբհա Մահիդոլին Բանգկոկի Չուլալոնգկորն հիվանդանոցում, ուր նա տեղափոխվել էր այն բանից հետո, երբ չորեքշաբթի օրն անգիտակից ընկել էր՝ սրտի խնդիրների պատճառով։

Հիվանդությունների վերահսկման դեպարտամենտի տվյալներով՝ գերիշխող օմիկրոն ենթատեսակով վարակների թիվն աճել է Բանգկոկում եւ Թաիլանդի զբոսաշրջային վայրերում այն բանից հետո, երբ երկիրը թուլացրել է 2020 թվականից գործող սահմանափակումները:

Դեպարտամենտի տվյալներով՝ բնակչության 82 տոկոսը կամ առնվազն 57 միլիոն մարդ պատվաստվել է առնվազն մեկ պատվաստանյութով։ Նրանցից 53,5 միլիոնը ստացել է երկրորդ, իսկ 32,5 միլիոնը՝ երրորդը դեղաչափը։