Սպանության կասկածանքով ձերբակալվել է Գավառ քաղաքի 42-ամյա բնակիչը

Իրավունք 19 Դեկտեմբեր, 2022 12:10

2022թ. դեկտեմբերի 18-ին՝ ժամը 20:15-ին, Գավառի բժշկական կենտրոնից ահազանգ է ստացվել այն մասին, որ նույն քաղաքի Սայադյան փողոցի տներից մեկում մահացած վիճակում իրենց մոտ է տեղափոխվել Երևան քաղաքի 31-ամյա բնակիչը՝ բազմաթիվ վնասվածքներով: ԱՅս մասին հայտնում են ՔԿ-ից։

Դեպքի առթիվ ՀՀ քննչական կոմիտեի Գեղարքունիքի մարզային քննչական վարչությունում նախաձեռնվել է քրեական վարույթ՝ ՀՀ քրեական օրենսգրքի 155-րդ հոդվածի 1-ին մասով:

Կատարվել է դեպքի վայրի զննություն, որի ընթացքում վերցվել են արնանման հետքերի նմուշներ, ծալովի դանակ, հագուստներ և այլ պարագաներ: Հարցաքննվել են մի շարք անձինք:

Ձեռնարկված միջոցառումների արդյունքում պարզվել է, որ հիշյալ հասցեում վիճաբանություն է առաջացել 31-ամյա տղամարդու և Գավառ քաղաքի 42-ամյա բնակչի միջև, որի ընթացքում վերջինս դեռևս չպարզված գործիքով բազմաթիվ հարվածներ է հասցրել 31-ամյա տղամարդու մարմնի տարբեր հատվածներին, ով ստացած վնասվածքներից մահացել է:

Անմիջականորեն առաջացած հիմնավոր կասկածի հիմքով ձերբակալվել է Գավառ քաղաքի 42-ամյա բնակիչը:

Նշանակվել են դիակի դատաբժշկական, դատահետքաբանական, դատագենետիկական փորձաքննություններ: Հանձնարարություն է տրվել հետաքննության մարմնին:

Կատարվում է նախաքննություն:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: