Դահուկորդներին հագեցած մրցաշրջան է սպասվում

Սպորտ 19 Դեկտեմբեր, 2022 13:20

Հայաստանի դահուկային սպորտի ֆեդերացիային հագեցած մրցաշրջան է սպասվում:

«Արմենպրես»-ի հետ զրույցում այս մասին հայտնեց ֆեդերացիայի նախագահ Գագիկ Սարգսյանը: Վերջինս, խոսելով նոր մրցաշրջանում մարզիկների ելույթներից, շեշտեց, որ մարզիկների համար մրցաշարերի մեկնարկը տրվել էր հոկտեմբեր ամսից:

«Ցավոք, այժմ խնդիր ունենք ձյան հետ: Աշոցքում ձյուն չկա: Հայաստանի դահուկային սպորտի հավաքականի գլխավոր մարզիչ Արթուր Միքայելյանը և նրա որդիները իրենք են ձյունը հավաքել և դահուկուղի պատրաստել: Դահուկորդները սկսել են նախապատրաստվել Համաշխարհային ուսանողական խաղերին: Միքայել Միքայելյանը մարզչի հետ կմասնակցի այդ խաղերին»,-ասաց Սարգսյանը:

Ֆեդերացիայի նախագահի խոսքով` Համաշխարհային ուսանողական խաղերին կմասնակցի նաև սնոուբորդիստների ներկայացուցիչ:

«Մենք շատ լուրջ աշխատանքներ ենք կատարում սերնդափոխության համար: Առանձնակի ուշադրություն ենք դարձնելու 2008 թվականից հետո ծնվածներին: Աշխատանքներ ենք կատարում հերթափոխի ուղղությամբ: Ցավոք, անում ենք այն, ինչը պետք է անեն մարզադպրոցները»,-ասաց նա:

Սարգսյանը լիահույս է, որ փոխարինող սերունդը լավն է և կարող է մրցունակ լինել:

Ֆեդերացիայի նախագահի խոսքով` իր համար զարմանալի էր, որ սպորտի ռազմավարության նախագծում միայն մեկ նախադասությամբ է անդրադարձ կատարվել ձմեռային մարզաձևերին:

Հայաստանի դահուկասպորտի ֆեդերացիան շարունակելու է խորացնել համագործակցությունը միջազգային կառույցների հետ: Համագործակցությունն իր մեջ ներառում է աշխատանքներ Բելառուսի և Չինաստանի ֆեդերացիաների հետ: 2023 մեկնարկին դահուկորդներն իրենց ուժերը կչափեն աշխարհի առաջնությունում, աշխարհի գավաթի խաղարկության փուլերում: Դահուկորդներն Օլիմպիական խաղերի քվոտայի վարկանիշային միավորներ կսկսեն հավաքել 2023 թվականից սկսած: