Կրիշտիանու Ռոնալդուի հարսնացուն անկեղծացել է որդու մահվան և դստեր հիվանդության մասին

Պորտուգալիայի հարձակվող Կրիշտիանու Ռոնալդուի հարսնացուն՝ մոդել և պարուհի Ջորջինա Ռոդրիգեսը անկեղծ հարցազրույց է տվել Elle España ամսագրին։ Համապատասխան հոդվածը հայտնվել է հրատարակության կայքում։

Ջորջինա Ռոդրիգեսը դարձել է Elle ամսագրի իսպանական տարբերակի հունվարյան համարի հերոսուհին։ Կրիշտիանու Ռոնալդուի հարսնացուն կեցվածք է ընդունել հրապարակման շապիկի համար և անկեղծ հարցազրույց է տվել, որում խոսել է 2022 թվականի մասին՝ որպես «իր կյանքի ամենադժվար տարի»: «Ամենաուրախ պահը դարձել է ամենատխուրը և կմնա մեզ հետ ամբողջ կյանքում», - ասել է նա: Բանն այն է, որ ապրիլին մոդելն ու ֆուտբոլիստը դուստր են ունեցել, իսկ նրա երկվորյակ եղբայրը մահացել է ծննդաբերության ժամանակ։

Հարցազրույցի պահին յոթ ամսական Բելլա Էսմերալդան հոսպիտալացված էր բրոնխիոլիտով։ «Ջորջինա Ռոդրիգեսը գիշերն անցկացրել է հիվանդանոցում իր փոքրիկ աղջկա հետ՝ հինգ երեխաներից ամենափոքրը, որին  մեծացնում են Կրիշտիանու Ռոնալդուի հետ: Սակայն, չնայած հոգնածությանը, նա չի չեղարկել մեր հանդիպումը»,- նշում են Elle España-ի խմբագիրները։ «Նա բարձր ջերմություն ունի։ Ես միայն ուզում եմ փոքրիկ աղջկաս հետ լինել հիվանդանոցում»,- կիսվել է մոդելը։

Լրագրողների հետ հարցազրույցում Ջորջինա Ռոդրիգեսը խոսել է նաև Կրիշտիանու Ռոնալդուի հետ հարաբերությունների մասին։ «Ես և Կրիշտիանուն սիրահարվեցինք առաջին հայացքից, երբ առաջին անգամ տեսա նրան, ինձ թվաց, որ ժամանակը կանգ է առել։ Այսքան գեղեցիկ, այդքան ուշադիր տղամարդ դեռ չէի տեսել... Եվ այո, ես աշխարհի լավագույն ֆուտբոլիստի ընկերուհին եմ, բայց մարդիկ, հատկապես կանայք, պարտադիր չէ, որ սա նվաստացնող իմաստով օգտագործեն։ Ակնհայտ է, որ նրա հետ իմ հարաբերությունները թույլ տվեցին իրականացնել իմ երազանքներից շատերը, բայց միշտ, թե՛ նրա հետ հանդիպելուց առաջ, թե՛ հետո, ես նույն կիրքն եմ դրել այն ամենի մեջ, ինչ անում էի… Անկախ նրանից, թե հավաքարար էի, վաճառող, թե մոդել»,- ասել է նա։