Շունը փրկել է տիրոջը և 12 օր անց կարոտից մահացել կացարանում

Չինաստանի Չժեցզիան նահանգի Հանչժոու քաղաքում հավատարիմ շունը փրկել է տիրոջը, ով կաթված էր ստացել, և 12 օր անց սատկել է կացարանում՝ չդիմանալով նրանից բաժանմանը։ Այս մասին հայտնում է SCMP-ը։

Յան անունով 78-ամյա տղամարդը միայնակ էր ապրում։ Ինը տարի առաջ նա որդեգրել էր շան ձագ, անվանել նրան Ավան և այդ ժամանակվանից խնամում էր նրան:

Երբ Յանը կաթված է ստացել,  շունը սկսել է երկար ու ուժեղ հաչել, ինչը գրավել է հարեւանների ուշադրությունը։ Կենդանու տերը նրանց թակոցներին չի արձագանքել և դուռը չի բացել, ուստի ոստիկանություն են կանչել։ Բնակարան մտնելուց հետո ոստիկանները տղամարդուն հայտնաբերել են հատակին ընկած։

«Մենք շանը ասացինք, որ եկել ենք նրա տիրոջը փրկելու։ Նա կարծես հասկացավ մեր խոսքերը և հանգիստ պառկեց», - ասել է ոստիկանության խոսնակ Շեն Ցզյանհուանը: Յանը հոսպիտալացվել է։ Մի քանի օր անց սոցաշխատողները Ավանին տեղափոխել են թափառող շների կացարան։

Կացարանում շունը հրաժարվել է ուտել ու խմել և 12 օր անց մահացել: Կացարանի մենեջերի խոսքով՝ իրենց մոտ եկող շներից շատերը սատկում են միջավայրի փոփոխության պատճառով՝ սթրեսից, քանի որ չեն կարողանում հարմարվել նոր միջավայրին։