Սա հանցագործության մասին հաղորդում է․ փորձագետը՝ Փաշինյանի՝ բուհերի մասին հայտարարության մասին

Կառավարության այսօրվա նիստում վարչապետ Փաշինյանը հայտարարեց, որ ՀՀ-ում չկա գեթ մեկ բուհ` ո՛չ հայկական, ո՛չ արտերկրյա, որը համապատասխանի ՀՀ օրենսդրության հավաստագրման, արտոնագրման պայմաններին։

Ճգնաժամը հաղթահարելու կառավարության առաջարկած լուծումը, ըստ Փաշինյանի, ակադեմիական քաղաքի ստեղծումն է։ 

ԼՈՒՐԵՐ.com-ի հետ զրույցում կրթության փորձագետ Ատոմ Մխիթարյանը նշեց, որ կարելի է ասել՝ դա արդեն հանցագործության մասին հաղորդում է, որովհետև եթե չեն համապատասխանում ՀՀ օրենսդրության հավաստագրման, արտոնագրման պայմաններին՝ ինչպե՞ս են գործում․

«Չգիտեմ՝ դա որտեղի՞ց են վերցրել, որովհետև բոլոր բուհերը անցնում են օրենքին համապատասխան հավատարմագրման գործընթաց և մինչև այդ ունենում են լիցենզավորման գործընթաց, որը բավարար է, որպեսզի կարողանան լիցենզիա ստանալ։

Այս հայտարարության դեպքում նշանակում է, որ այդ փաստաթղթերը կե՞ղծ են,  կարելի՞ է հարցնել կառավարությանը, եթե այս փաստաթղթեը կեղծ են, ապա գտեք այն մարդկանց, ովքեր կեղծել են այդ փաստաթղթերը և պատժի ենթարկեք։

Հայաստանը այժմ գտնվում է այնպիսի իրավիճակում, որ ակադեմիական քաղաքը ոչ թե երկրորդական այլ երրորդական, չորրորդական հարց է, առավել ևս, որ բուհական համակարգը այժմ իսկապես ճգնաժամի մեջ է,  բայց դա չի նշանակում, որ պետք է ուսումնական հաստատությունները քանդել։

Ովքե՞ր են գալու փոխարինելու այսօրվա դադսախոսներին  և գիտնականներին, հարցրեք ուսանողներին, ովքե՞ր կգնան Երևանից դուրս բարձրագույն ուսումնական հաստատություններում սովորելու․ ոչ ոք չի գնա և դա է պատճառը, որ այժմ շրջանավարտների մեծ մասը չի դիմում պետական բուհեր, այլ դիմում է միջպետական կամ մասնավոր բուհեր, որովհետև նրանց վրա կառավարության ազդեցությունը շատ չնչին է»,- ասաց Մխիթարյանը և հավելեց, որ այս ամենը կարճ մտածողության հետևանք է և փոխարենը  եղածը պահպանենք, այլ հակառակը՝ կառավարությունը վերջնականապես տակնուվրա անելու կուրս է բռնել։

Փորձագետը նշեց` կրթության որակը այնքան է իջել, որ մեր շրջանավարտները չեն կարողանում հաղթահարել գոնե նվազագույն ութ միավորը, որպեսզի կարողանան բարձրագույն ուսումնական հաստատություններ ընդունվել։ Ըստ նրա՝ փոխանակ մենք մտածենք կադրերի պատրաստման, վերապատրաստման, հանրակրթության ոլորտում պայմանների բարելավման մասին, մենք հակառակ քայլերն ենք անում։

Լիլիթ  Զալիբեկյան