Էսկալացիայի սցենարը հնարավոր չէ բացառել․ Փաշինյան

Ուկրաինայում Ռուսաստանի ռազմական գործողությունները նշանակում են, որ Հայաստանն այլևս չի կարող ապավինել Մոսկվային՝ որպես իր անվտանգության երաշխավորի, նույնիսկ այն դեպքում, երբ մեծանում են մտավախությունները Ադրբեջանի հետ բաց հակամարտությսնը վերադառնալու հարցում, POLITICO-ին տված հարցազրույցում ասել է Հայաստանի վարչապետ Նիկոլ Փաշինյանը։

Ըստ պարբերականի՝ Փաշինյանի ընդգծված քննադատությունը Ռուսաստանի՝ որպես Կովկասում ոստիկան գործելու անկարողության վերաբերյալ միայն ուժեղացնում է այն զգացումը, որ Կրեմլը կորցնում է իր ազդեցությունը և չունի երբեմնի շատ գովաբանված գերտերության կարգավիճակը նախկին խորհրդային հանրապետություններում, որոնց ժամանակին Մոսկվան համարում էր իր ազդեցության գոտին:

«Երևանում հիասթափությունը կարող է լուրջ շրջադարձ լինել 2,8 միլիոնանոց երկրի համար, քանի որ ԽՍՀՄ-ի փլուզումից հետո նա իր երկաթուղու, էներգետիկ ոլորտի և նույնիսկ իր սահմանների վերահսկողության մեծ մասը պատվիրակել է Ռուսաստանին: 2020 թվականին Հայաստանը 44-օրյա պատերազմ մղեց Թուրքիայի կողմից աջակցություն ստացած Ադրբեջանի ավելի ուժեղ զորամիավորումների դեմ, հակամարտության հետևանքով հազարավոր մարդիկ զոհվեցին յուրաքանչյուր կողմից և Լեռնային Ղարաբաղում հրադադարը պահպանելու համար տեղակայվեցին ռուս խաղաղապահները: Այժմ Ռուսաստանն ամբողջությամբ ներգրավված է Ուկրաինայի հետ պատերազմում, ուստի Երևանում մեծանում են մտավախությունները, թե արդյոք ռուսական բանակը պատրաստ է կամ ի վիճակի է պահպանել խաղաղությունը Կովկասում։ Դա ընդգծված մտահոգություն է, քանզի կան բոլոր վտանգները, որ Հայաստանը կարող է վերսկսել Ադրբեջանի հետ մարտերը Լեռնային Ղարաբաղի համար»,– գրում է  POLITICO-ն:

«Ուկրաինայում տեղի ունեցող իրադարձությունների արդյունքում փոխվել են Ռուսաստանի հնարավորությունները»,- ասել է Փաշինյանը՝ ընդունելով, որ Մոսկվան ձգտում է խուսափել Ադրբեջանին և նրա մերձավոր դաշնակից Թուրքիային օտարելուց, որոնք երկուսն էլ Կրեմլի համար մինչև ուկրաինական պատերազմն էլ ունեցել են ռազմավարական նշանակություն։

«Մեր ռազմավարությունը պետք է լինի այն, որ փորձենք այս իրավիճակում առավելագույնս նվազեցնել մեր կախվածությունը ուրիշներից։ Մենք ուզում ենք ունենալ անկախ երկիր, ինքնիշխան երկիր, բայց պետք է ճանապարհներ ունենանք, որպեսզի չհայտնվենք Արևմուտքի ու Արևելքի, Հյուսիսի և Հարավի բախումների կենտրոնում… Չի կարող լինել դեպք, երբ Հայաստանը դառնա «պրոքսի»։ Սա անթույլատրելի է։ Մոդելը, որով մենք խնդիրներ ունենք մեր հարևանների հետ, և պետք է հրավիրենք ուրիշներին պաշտպանելու մեզ, կարևոր չէ, թե ովքեր են նրանք, շատ խոցելի մոդել է»,- ասել է վարչապետը։

Ըստ Փաշինյանի՝ «էսկալացիայի սցենարը հնարավոր չէ բացառել», սակայն նշել է, որ «մոբիլիզացված ուժերը պետք է վերադառնան իրենց բազաները» և պնդել է, որ «Հայաստանը պատրաստ է դա անել», նշում է POLITICO-ն։

Վարչապետը վերահաստատել է իր աջակցությունը ԱՄՆ-ի, ԵՄ-ի և Ռուսաստանի միջնորդությամբ անցկացվող բանակցություններին՝ Ադրբեջանի հետ տասնամյակների հակամարտությունից հետո խաղաղության համաձայնագրի հասնելու ջանքերի համար: 

«Եթե մենք ուզում ենք ունենալ հարատև, հավերժ պետականություն, առաջին հերթին պետք է շատ լուրջ քայլեր ձեռնարկենք և շատ լուրջ ջանքեր ներդնենք մեր հարևանների հետ հարաբերությունները կարգավորելու համար»,- ասել է նա։

Միևնույն ժամանակ, ընդունելով Ռուսաստանի՝ հին դաշնակցից կախվածությունը խզելու անհրաժեշտությունը, Փաշինյանը խոստովանել է, որ դեռ երկար ճանապարհ կա անցնելու, մինչև արևմտյան երկրները կարող են դիտվել որպես Հայաստանին անհրաժեշտ լիակատար աջակցություն առաջարկող:

«Մեր գործընկերները՝ ԵՄ-ն և Միացյալ Նահանգները նույնպես աջակցում են մեզ, երբ խոսքը վերաբերում է ժողովրդավարական բարեփոխումների օրակարգին»,- ասել է նա՝ ավելացնելով. «Չեմ կարող ասել, որ այն աջակցությունն ու օգնությունը, որ մենք ստանում ենք, բավարար են մեր նպատակներին և մեր օրակարգերին ծառայելու համար»։