Հնդիկ գեներալն առաջարկում է Հայաստանում «Հնդկական բանակի ուսումնական խումբ» տեղակայել

Հնդկաստանը կարող է Հայաստանում «Հնդկական բանակի ուսումնական թիմ (IATT)» ստեղծել, որը կտեղակայվի Հայաստանի զինված ուժերի ստորաբաժանումների հետ։ Այս մասին գրել է հնդիկ գեներալ-մայոր Աշոկ Կումարը (թոշակի անցած) News.am–ի փոխանցմամբ՝ հայտնում է Firstpost-ը։

«Աշխարհի աշխարհաքաղաքական լանդշաֆտը բավականին արագ է փոխվում։ Սկզբում ուշադրության կենտրոնում Ռուսաստանի և Ուկրաինայի միջև պատերազմն էր, իսկ այժմ՝ ՀԱՄԱՍ-ի և Իսրայելի պատերազմը:

ԱՄՆ-Չինաստան հարաբերությունները սրվում են նաև Հնդկ-Խաղաղօվկիանոսյան, Հարավչինական ծովի և Թայվանի հետ կապված խնդիրների պատճառով:

Այս ամենի ֆոնին Հայաստանի և Ադրբեջանի միջև խոշոր հակամարտությունը, որն ազդել է 100.000 հայերի վրա, անցավ երկրորդ պլան, չնայած այն հանգամանքին, որ գրեթե ողջ հայ բնակչությունը ստիպված էր լքել իր տները:

Հայկական անկլավը (Լեռնային Ղարաբաղը) գրավելու համար Ադրբեջանի կողմից սկսված ռազմական գործողությունից հետո ծայրահեղ կարևոր է, որ Հայաստանը վերագնահատի իր ուժեղ և թույլ կողմերը։ Սա կօգնի նրան որոշել բարեփոխումների ուղղությունը:

Վատ չէր լինի, եթե Հայաստանն օգտվեր Հնդկաստանի օգնությունից՝ մարզելու իր զինված ուժերը՝ մարտունակությունը բարձրացնելու համար։

Հնդկաստանը կարող է Հայաստանում ստեղծել «Հնդկական բանակի ուսումնական թիմ (IATT)», որը տեղակայված կլիներ Հայաստանի զինված ուժերի ստորաբաժանումների հետ։

IATT-ը Հայաստանի համար հարմար է մի քանի պատճառներով.

Հայաստանը երկու կողմից սպառնալիքների է բախվում՝ արևմուտքից՝ Նախիջևանից և արևելքից՝ Լեռնային Ղարաբաղից։

Հայաստանը պետք է պատրաստված լինի և ընդունակ լինի «երկու ճակատով պատերազմ» վարելու։ Հնդկաստանը լավագույնս կարող է օգնել Հայաստանին այս համատեքստում, քանի որ Հնդկաստանը կռվեց և հաղթեց երկու ճակատով պատերազմում 1971 թվականին և այժմ գործ ունի նմանատիպ սպառնալիքի հետ երկու ճակատներում՝ Չինաստանից և Պակիստանից:

Բացի այդ, Հնդկաստանն արդեն ունի այլ երկրներում IATT-ի հաջող ստեղծման փորձ:

Հնդկաստանն Ադրբեջանի հետ պատերազմի ֆոնին Հայաստան է արտահանել Pinaka հրթիռային համակարգը։ Սա վկայում է այն կարևորության մասին, որ Հնդկաստանը տալիս է Հայաստանին միջազգային անվտանգության համակարգում»,- գրել է նա։

Նշենք, որ Աշոկ Կումարը մասնակցել է 1999 թվականին Հնդկաստանի և Պակիստանի միջև տեղի ունեցած Կարգիլ պատերազմին։