Ի՞նչ հիմնավորմամբ է «կարմիր գծերի» համար տարեկան 160 հազար դրամ սահմանվում

Երևանի քաղաքապետարանն առաջարկում է քաղաքի փոքր կենտրոնում «կարմիր գծերի» համար տարեկան 160 հազար դրամ վճար սահմանել, որպեսզի վարորդները ոչ թե իրենց մեքենայով, այլ մեկ ուրիշ տրանսպորտային միջոցով կամ քայլելով հասնեն իրենց ուզած վայր։ Այս մասին այսօր՝ դեկտեմբերի 1-ին, «կարմիր գծերի» վճարն ավելացնելու հետ կապված հանրային լսումների ժամանակ պնդել է Երևանի քաղաքապետի տեղակալ Սուրեն Գրիգորյանը։

«Իրականում գումարի չափն ուղղված չէ բյուջերի եկամուտներն ավելացնելուն։ Բարձր գումար սահմանելով` մենք ավելի շատ ուզում ենք, որ ոչ թե քաղաքացին այդ գումարը վճարի ու օգտվի կայանատեղիից, այլ չվճարի ու չօգտվի կամ էլ օգտվի, օրինակ, հանրային տրանսպորտից։ Կան մարդիկ, որ հասարակական տրանսպորտից կարող են օգտվել և ցերեկվա ոչ պիկ ժամերին հասնել փոքր կենտրոն, բայց նախընտրում են ավելի հարմարավետ տարբերակ` իրենց մեքենայով գալ և ուրիշ քաղաքացիների համար խցանման պատճառ դառնալ»,- նշել է փոխքաղաքապետը։

Նրա խոսքով՝ էլեկտրական ավտոմեքենաները ազատված կլինեն Երևանի կենտրոնում ավտոկայանատեղիում (կարմիր գծեր) կայանելու համար տուրքերից։

«Էլեկտրական ավտոմեքենաներն ազատված են այս տուրքից և ազատված են մնալու։ Դա արվում է այն տրամաբանությամբ, որպեսզի խրախուսենք էլեկտրական տրանսպորտով մարդկանց երթևեկելը, ինչը հսկայական բնապահպանական կոմպոնենտ ունի իր մեջ»,–ասաց Գրիգորյանը։

Գրիգորյանը նշեց, որ նախկինում եղել է ընթացակարգ, որ այդ արտոնությունից օգտվելու համար պետք էր դիմում գրել Երևանի քաղաքապետարան, բայց այժմ այդ խնդիրը լուծվել է։

«Տեսախցիկներով հսկող կազմակերպությունը տվյալներ է ստանում ոստիկանության բազայից և այդ տվյալներն ունենալով՝ դիմումներ գրելու անհրաժեշտություն չի լինում։ Համակարգը գործում է ինքնաշխատ տրամաբանությամբ»,–ասաց նա։