Խաբված նպաստառուներ, խորացող աղքատություն. Փաշինյանն ու թիմակիցները 2018-ին ստել են

Թավշյա հեղափոխության օրերին Նիկոլ Փաշինյանի և նրա թիմակիցների կողքին կանգնեցին հատկապես սոցիալապես անապահով խավերը` հույս ունենալով, որ հեղափոխության հաղթանակի դեպքում նրանց սոցիալական բեռը կնվազի, կյանքի որակն էլ կբարձրանա: Վերջիններս նման հույսեր փայփայելու բոլոր իրավունքներն ունեին, քանի որ հեղափոխականները հենց նման խոստումներ էին շռայլում նրանց: Իսկ այժմ տեսնենք, թե ինչ եղավ այն բանից հետո, երբ հեղափոխական թիմի ներկայացուցիչները եկան իշխանության:

Կառավարության 2022 թվականի հունիսի 22-ի նիստում նիկոլ Փաշինյանը նպաստ ստացողների մասին ասում էր․ «Եթե մարդը գործունակ է, այսինքն՝ կարող է աշխատել, թող աշխատի․ ինչո՞ւ պետք է մյուսներն աշխատեն, իսկ ինքը ստանա սոցիալական նպաստ, էլ չեմ ասում՝ մի հատ էլ տանի խաղադրույք անի»։ Ուշագրավ է, որ տարիներ առաջ, երբ դեռ մեկ տարի չկար, ինչ վարչապետ էր, 15․02․2019թ․ կառավարության նիստում ասում է․ «Ռեալ ընտանեկան և սոցիալական նպաստ ստացող մարդը պետք է չզրկվի աշխատելու պատճառով այդ համակարգից»։

2018 թվականին խորհրդարանական արտահերթ ընտրություններին «Իմ քայլը» դաշինքը մասնակցում էր «Երջանիկ անհատ, հոգատար հանրություն, հզոր պետություն» կարգախոսով։ Նախընտրական ծրագրում խոստանում էին․ «Մինչև 2023 թվականը աղքատությունը իջեցնելու ենք առնվազն 10 տոկոսային նիշով` վերացնելով ծայրահեղ աղքատությունը»։ Այդ ժամանակ Հայաստանում աղքատությունը, համաձայն վիճակագրական կոմիտեի, կազմում էր 23,5 տոկոս։ Այսինքն՝ 2023 թվական պետք է Հայաստանը մտներ 13,5 տոկոս աղքատության ցուցանիշով։ Սակայն պաշտոնական վիճակագրությունը այլ պատկեր է ցույց տալիս։ Մասնավորապես, 2022 թվականին աղքատությունը կազմել է 24,8 տոկոս՝ 1,3 տոկոսով ավելի շատ՝ ի համեմատ 2018 թվականի։ Ծայրահեղ աղքատությունը 2022թ․ կազմում է 1․2 տոկոս, այնինչ Նիկոլ Փաշինյանը խոստանում էր վերացնել։ 21․11․2018 թվականին Նիկոլ Փաշինյանը հայտարարում է․ «Իմ խորին համոզմամբ՝ երկար տարիներ ՀՀ-ում խրախուսվել է աղքատությունը, քանի որ գործող քաղաքական համակարգին ձեռնտու է եղել, որ մարդիկ լինեն աղքատ, քանի որ աղքատ մարդկանց ընտրակաշառքով շատ ավելի հեշտ է ուղղորդել կոնկրետ ընտրության: Մենք ուզում ենք, որ ՀՀ-ում լինեն հարուստ մարդիկ»։

Հայաստանում վերջին 5 տարիներին գրեթե չի նվազել աղքատների թիվը։ 2019-ին աղքատության ցուցանիշը 26.4 տոկոս էր, 3 տարի անց՝ 2022-ին՝ 24.8 տոկոս։

2018 թվականի ապրիլի 15-ին Հանրապետության հրապարակում ունեցած ելույթի ժամանակ Նիկոլ Փաշինյանը հայտարարեց. «Այսօր ՀՀ քաղաքացիները գտնվում են գերության մեջ: Այսօր ՀՀ տասնյակ, եթե ոչ հարյուր հազարավոր քաղաքացիներ բառի բուն իմաստով ճգնում են բանկային ժամկետանց տոկոսների տակ: Մենք կարծում ենք, որ միանշանակ եւ աներկբա պետք է զրոյացնել բոլոր ժամկետանց տուգանքները բոլոր սպառողական եւ գյուղատնտեսական վարկերի: Առանց բացառության՝ բոլոր»։ Սակայն, չկա գեթ մեկ դեպք, երբ Նիկոլ Փաշինյանի իշխանությունը որեւէ քաղաքացու ազատել է գերությունից: Այժմ Փաշինյանը հայտարարում է՝ «Ուղիղ ասեմ՝ դեմ եմ նման որոշումներին։ Հեշտ է ասելը եկեք ազատենք, հարկերից ազատենք, վարկերից ազատենք, սնունդ բաժանենք, կոմունալները չվերցնենք։ Հեշտ եք ասու՞մ, տենց ասելով չէ։ Պետք է խոսքի արժեքին էլ հետևել։ Նստում, ասում են՝ հարկերը թողեք, վարկերը թողեք, էս օգնեք, ձե՞ռ եք առնում: Նենց տպավորություն է, որ դուք բաժանողն եք, մենք էլ թույլ չենք տալիս: Ես դեմ եմ նման բաների։ Գնացեք ձեր շրջապատի, միջավայրի հարստությունը բաժանեք մարդկանց վաբշե, հերիք ա»:

ԱԺ թեթե ձեռամբ թանկացավ գույքահարկը` դոմինոյի էֆֆեկտով թանկացումներ առաջացնելով նաև մյուս ոլորտներում: Նախագծի հեղինակները «Իմ քայլը» խմբակցության պատգամավորներ Գևորգ Պապոյանն ու Արգիշտի Մեխակյանն էին  (արդեն նախկին պատգամավոր)։

Վերջերս կառավարությունում, հասարակության աչքից ու ականջից հեռու, մի որոշում են ընդունել, որով հաստատել են հարկային եկամուտների կառավարման ծրագիրը։ Այն վերաբերում է առաջիկա 3 տարիների հարկային քաղաքականությանը։ Կառավարությունը պատրաստվում է ընդլայնել հարկման բազան, կրճատել հարկային արտոնությունները, բարձացնել հարկային բեռը, վերանայել հարկերի ու պարտադիր վճարների քանակը։ Վերջինը, բնականաբար, վերաբերում է դրանց ավելացմանը։

Վերը թվարկածն ընդամենը մի քանի օրինակ են այն բանի, թե ինչպես են հեղափոխությունից հետո Փաշինյանն ու թիմակիցները հարվածել՝ առանց այդ էլ ծանր սոցիալական դրության մեջ գտնվող քաղաքացիների գրպանին: Մի դեպքում, երբ 2018-ին նրանց փողոց էին հանում խոստանալով աղքատության հաղթահարում, արդարություն և բարեկեցիկ ապագա...