«Պապիի գերեզման» կամ «Մոսկվիչի» անվադողերից հետո

Ոստիկանությունն իր օպերատիվությամբ ու հանցագործությունների բացահայտման տեմպերով արդեն ռեկորդակիր դառնալու հայտ է ներկայացնում: Հասարակությունը դեռ չէր հանդարտվել 22 տարի անց սովետական կրիմինալի բացահայտման հերոսական դրվագի պատճառած հուզմունքից, երբ ոստիկանությունը մեկ այլ՝ հանուն պապիի գերեզմանի կատարված հանցագործությունը կարողացավ բացահայտել: Բերման են ենթարկվել Գառնի գյուղի բնակիչներ 1989 թ. ծնված Ֆելիքս Մ.-ն, 1981 թ. ծնված Սևակ Հ.-ն և 1981 թ. ծնված Ջիվան Դ.-ն, որոնք էլ խոստովանել են, որ հոկտեմբերի կեսերից մինչև նոյեմբերի 26-ն ընկած ժամանակահատվածում մոտ 6-7 անգամ, Ջիվան Դ.-ին պատկանող «ԳԱԶ-24» մակնիշի ավտոմեքենայով Գառնու ձորի ժայռի բազալտե սյուներից տարիների ընթացքում պոկված ու գետնին թափված բազալտե հարթ սալիկները տեղափոխել են նրա պապի գերեզմանատեղն ու պարիսպ կառուցել:

«Քարերի սիմֆոնիային» ձեռք տվող չկա, «Քարերի սիմֆոնան» չեն կտրել, պարզապես քարերն են իրենք իրենց թափվել, դե, տղերքն էլ հավաքել ու էդքան դժվարությամբ, էն էլ ջարդուխուրդ «24»-ով մի կերպ տարել են, էն էլ՝ հանուն պապիի գերեզմանի. երևի պապին էր ասել, պապիի սիրտն էր ուզել «Քարերի սիմֆոնիայից» գերեզմանի պարիսպ ունենանալ, դե տղերքն էլ հո չէին թողնի պապիի մուրազն անկատար մնար ... «պապիի գերեզման»՝ երևի ասել են տղերքն ու մեր փառապանծ ոստիկանները հավատացել են:

Դատելով ոստիկանական հաղորդագրությունից՝ մեր փառապանծ, բայց համատեղության կարգով նաև անխնա ոստիկանները «հանուն պապիի գերեզմանի օպերացիան» սակայն որակել են որպես հանցագործություն, ինչի պատճառով պապիի համար քար հավաքողները ևս կհամալրեն հանցագործների շարքերը՝ ևս մեկ միավոր ավելացնելով ոստիկանության՝ հանցագործությունների բացահայտման ցուցանիշներին:

«Քարերի սիմֆոնիայի» կողոպուտը ոչ մեկ, ոչ էլ երկու ամսվա պատմություն ունի: Գառնու ձորից քարերի թալանը տարիների՝ այդպես էլ չբացահայտվող ու չդադարող գործ է: Եվ հիմնականում այդ թալանը ո՛չ թե «ԳԱԶ-24»-երով է իրականացվում, այլ քարերի փոխադրման համար ավելի հարմարավետ, բեռնատար ավտոմեքենաներով: Վերջին ահազանգի հեղինակները բնապահպան ակտիվիստներն էին, որի հետքերով էլ գնացած ոստիկանները մի քանի երիտասարդ գյուղացի տղաների բռնելու միջոցով փորձ են անում փակել «Քարերի սիմֆոնիայի» թեման և հանցագործության դիմաց հաճելի «պտիչկան» տեղադրելով՝ այն ուղարկել բացահայտվածների դարակ:

Իրականում այս ձորն ավելի քան պաշտպանված է: Այստեղ, ըստ էության, ոչ մի պատահական սուբյեկտ չի էլ կարող մուտք գործել: Գառնու ձորի ամենամեծ խայտառակությունը դեպի «Քարերի սիմֆոնիա» տանող ճանապարհին «ռեկետ» անող 84-ամյա Համբարձումյան Հրանտն է, որը ներկայանում է որպես հարկայինի աշխատող՝ «գնա Աբովյանի հարկային, հարցրա՝ ես ընդեղ գրանցված եմ», ասում, թե ձորն իր սեփականությունն է և բոլոր ավտոմեքենաներից՝ առանց բացառության, պլոկում 1000-ական դրամ: «Չեմուչումի» դեպքում մեքենաներն ու նրանց տերերը ենթարկվում են ահաբեկության՝ Հրանտ «բիձու» ձեռքի բոյաչափ փայտի կողմից: Բնական է, որ այս ծերունին (թեև վերջինիս ագրեսիան և սանձարձակությունը հաշվի առնելով՝ դժվար է նրան անգամ ծերունի կոչել) ինքնագործունեությամբ չէր կարող զբաղվել: «Ընենց չանես կանչեմ, գան թևերդ օլորեն, տանեն, ավտոն էլ ձեռիցդ առնեն» ասողի մեջքին երևի թե նաև ոստիկաններ են կանգնած՝ հաշվի առնելով, որ ծերունու դիտակետից մի քանի մետր այն կողմ հենց ոստիկանական կետ է, որոնց սակայն ծերունու ապօրինությունները երբևէ չեն անհանգստացնում: Ի դեպ, սա բացառիկ վտանգավոր գոտի է՝ հաշվի առնելով, որ այստեղ հեռախոսային ալեհավաքներն անհասանելի են, այնպես որ ցանկացած պատահարի դեպքում անհնար կլինի որևէ մեկին օգնության կանչել:

Համբարձումյան Հրանտն ասում է, թե ինքն արդեն 21 տարի այստեղ է, և ոչ մեկ առանց իր թույլտվության ու առանց իրեն մուծվելու չի կարող մտնել «Քարերի սիմֆոնիա»: Ժամանակին «Քարերի սիմֆոնիայի» թալանի մեջ մեղադրվում էր Ազգային պատկերասրահի տնօրեն Փարավոն Միրզոյանը. արվեստին մոտ կանգնած այս անձնավորությունը նախընտրել էր իր ամառանոցի համար հենց այս քարերն օգտագործել: Նման նախընտրություններ այս տարիներին դրսևորել են նաև արվեստին ոչ այդքան մոտ կանգնած, փոխարենը որոշակի լծակներ ունեցող շատ այլ անձինք, որոնց անունները, սակայն, այդպես էլ գաղտնի են պահվում կամ տարածվում լոկ շշուկների տեսքով: Այնպես որ, հանուն պապիի գերեզմանի մի քանի թափված քարեր հավաքած այսօրվա մեր հերոսները այս թալանչիների շարքում երևի թե ամենաանմեղն են:

Լուսինե Կեսոյան

«Խոստացված պապին»

{gallery}papi{/gallery}