Ռազմարդյունաբերողների համար շահույթի շեմը հանվել է․ սա թթվածին է ընկերությունների համար․ ԲՏԱ նախարար

Երկարատեւ աշխատնքի արդյունքում 2024-ին վերջապես հաջողվեց մեծ փաթեթով փոփոխություններ ընդունել ռազմարդյունաբերական համալիրի մասին օրենքում: Այս մասին տարեկան ամփոփիչ մամուլի ասուլիսի ժամանակ նշեց ԲՏԱ նախարար Մխիթար Հայրապետյանը:

«Այն գալիս էր 4 նոր գործառույթներով օժտելու ռազմարդյունաբերության կոմիտեին: Առաջինը գալիս է կանոնակարգելու և հեշտացնելու գիտահետազոտական աշխատանքների եւ փորձարարական մշակումների ոլորտում, ըստ էության, ռազմարդյունաբերության ոլորտի ընկերություններին առավել հեշտացված խաղի կանոններ սահմանելով, որոնք պետության կողմից տրվող դրամաշնորհային ծրագրերից են օգտվում:

Փոփոխությունների երկրորդ ուղղությունը  վերաբերում է անհրաժեշտ քանակի փորձանմուշներ ռազմարդյունաբերության ընկերությունների կողմից փոխանցելու կառավարության որոշմանը: Սրանով վերջապես մենք հնարավորություն կունենանք դեռևս 2024-ի հունվարի 1-ից մեզ համար հատկացված 1,5-միլիարդանոց բյուջեն նպատակային ծախսել: Այս կարգերը ուժի մեջ մտնելու հետո արդեն ռազմարդյունաբերական ընկերությունները հնարավորություն կունենա դիմել ռազմարդյունաբերության կոմիտեին և պետական փորձարկումների համար անհրաժեշտ քանակի փորձանմուշներ ստանալու համար ֆինանսական աջակցություն ստանալ մեր կողմից։

Երրորդ ուղղությունը վերաբերում է պետական փորձարկումների ողջ ընթացակարգին: Սա գալիս է առավել դյուրացնելու, հեշտացնելու ընդհանրապես պետական փորձարկումների ողջ գործընթացները և վերջին՝ չորրորդ կարգը վերաբերում է անհրաժեշտ լրամասերի, նյութերի, բաղադրիչների համապատասխան գնումներին, մեր կողմից պահուստավորելու և հետագայում ռազմարդյունաբերական ընկերություններին վերաբաշխելու»,- ասաց նախարարը:

Նրա խոսքով, սրանից զատ ռազմարդյունաբերության ոլորտում մեկ այլ հիմնարար կարևոր բարեփոխում են իրականացրել.

«Տասնամյակներ շարունակ ռազմարդյունաբերական ընկերությունները, որոնք պայմանագիր էին կնքում ՊՆ-ի հետ՝ սեփական պրոդուկտները մատակարարելիս հաշվի էր առնվում, որ անհրաժեշտ էր սահմանել շահույթի շեմ, ինչը սահմանափակում մեր ընկերություններին 15%-անոց շահույթի շեմով: Մեզ հաջողվեց երկարատև բանակցությունների, քննարկումների արդյունքում գնալ այս կարևոր և համարձակ որոշմանը: Հիմա շահույթի շեմը հանվել է, և, ըստ էության, ռազմաարդյունաբերողները և հիմնական պատվիրատուները այլևս բանակցությունների միջոցով կկարողանան սահմանել գինը: Սա յուրօրինակ ձևով, թույլ տվեք ասել, թթվածին է լինելու ռազմաարդյունաբերական ոլորտի ընկերությունների համար»,- հայտարարեց Մխիթար Հայրապետյանը: