ԱՄՆ ֆինանսների նախարարը հերքել է Ուկրաինայի հետ գործարքի մոտալուտ ստորագրումը

ԱՄՆ-ն մոտ ապագայում չի նախատեսում Ուկրաինայի հետ հանքանյութերի մասին համաձայնագիր ստորագրել, հայտարարել է ֆինանսների նախարար Սքոթ Բեսենտը։ Fox News-ի լրագրող Ջեքի Հենրիխն իր X-ում մեջբերել է նրա խոսքերը.

«Ֆինանսների նախարար Սքոթ Բեսենտը Fox-ին ասել է. «Ստորագրում չի նախատեսվում», - գրել է նա:

Ավելի վաղ Reuters-ը, վկայակոչելով աղբյուրներին, հայտնել էր, որ ԱՄՆ-ն ու Ուկրաինան մոտ ապագայում կարող են համաձայնագիր ստորագրել հանքային ռեսուրսների վերաբերյալ։ 

Գործարքի ստորագրումը պետք է տեղի ունենար փետրվարի 28-ին՝ Զելենսկու հանդիպման ժամանակ։ Այնուամենայնիվ, ուկրաինական կարգավորման շուրջ նրանց միջև հրապարակային վեճը հանգեցրեց նրան, որ Զելենսկուն և նրա պատվիրակությանը խնդրել են լքել Սպիտակ տունը: Պայմանագրի կնքումը խափանվել է։

Ուկրաինայի նախագահը առաջին օրերին ներողություն չի խնդրել կատարվածի համար, ինչպես ցանկանում էր ԱՄՆ-ը։ Բայց մարտի 4-ին նա ասաց, որ «շատ ցավում է» Թրամփի հետ հանդիպման ժամանակ ստեղծված իրավիճակի համար։ Նա իր պատրաստակամությունն է հայտնել աշխատել ԱՄՆ-ի հետ՝ «տևական խաղաղության հասնելու համար»։

Reuters-ի աղբյուրները հայտնել են, որ Կիևի և Վաշինգտոնի միջև վեճից հետո բանակցություններ են ընթանում համաձայնագրի շուրջ։ Թրամփի վարչակազմի պաշտոնյաները Զելենսկու խորհրդականներին հորդորել են, որ նա ներողություն խնդրի վեճի համար։