«Շերեմետևոյում» ձերբակալել են 3 ճամպրուկ արծաթյա զարդերով Երևան թռչող տղամարդուն

Օտարերկրացին երեք ճամպրուկով ապօրինի կերպով փորձել է Հայաստան արտահանել 10,5 հազար արծաթյա զարդ, սակայն «Շերեմետևո» օդանավակայանում մաքսավորները կանգնեցրել են նրան։ Այս մասին հայտնում է Ռուսաստանի Դաշնային մաքսային ծառայության մամուլի ծառայությունը։

««Շերեմետևո» օդանավակայանում մաքսավորները կասեցրել են գրեթե 10,5 հազար արծաթյա ապրանքների ապօրինի արտահանման փորձը։ Չինաստանից Մոսկվա եկած 50–ամյա օտարերկրացին փորձել է 2 մլն ռուբլի արժողությամբ զարդեր արտահանել Երևան»,– ասվում է հաղորդագրությունում։

Ուղևորի երեք ճամպրուկում հայտնաբերվել է զարդերի 273 փաթեթ, որոնցում եղել է մոտ 10,5 հազար զարդ, բոլորը՝ 925 հարգի արծաթից պատրաստված։ Տղամարդը մաքսային ծառայության աշխատակիցներին պատմել է, որ ապրանքը տանում էր Երևան` վաճառելու նպատակով։

Փաստի առթիվ քրեական գործ է հարուցվել ՌԴ ՔՕ 226.1 հոդվածի 1-ին մասով։ Քաղաքացուն սպառնում է ազատազրկում մինչև հինգ տարի ժամկետով կամ տուգանք մինչև մեկ միլիոն ռուբլի: