Իրանցի երգչին մտրակել են կանանց պաշտպանող երգի համար

Իրանում հայտնի երգիչ Մեհդի Յարահին մտրակի 74 հարված է ստացել բողոքի երգի համար՝ իր դեմ քրեական գործը կարճելու գործարքի շրջանակներում: Այս մասին հայտնում է The Guardian-ը։

Յարահին ի սկզբանե դատապարտվել էր 2024 թվականի հունվարին «անօրինական վարքագծի» համար՝ 2023 թվականի սեպտեմբերին «Քո գլխաշորը» (Ռու Սարիտո) երգը թողարկելուց հետո՝ նշելու «Կանայք, կյանք, ազատություն» ցույցերի առաջին տարելիցը: Դրանով նա դեմ է արտահայտվել կանանց համար Իրանի խիստ դրեսս-կոդին:

Յարահիի բանտում անցկացրած մեկ տարին հետագայում փոխարինվել է դատական ​​վերահսկողությամբ, որի ժամկետը լրացավ դեկտեմբերին: Երգչի փաստաբան Զահրա Մինվեյը համաձայնել է վերջնականապես դադարեցնել իր պաշտպանյալի նկատմամբ քրեական հետապնդումը մտրակի հարվածներ ստանալու դիմաց։ Մարտի 5-ին Մինվեյը սոցցանցերում հայտարարեց, որ պատիժն իրականացվել է։

«Դու ապակի ես բերել, որ մեր քարը ջարդես։ Նա, ով չի ցանկանում վճարել ազատության գինը, արժանի չէ դրան: Ձեզ ազատություն եմ մաղթում»,- գրել է Յարահին Instagram-ում, որտեղ նա ունի ավելի քան 1 միլիոն հետևորդ։ Նա շնորհակալություն է հայտնել փաստաբաններին։

Մտրակի լուրը մեծ վրդովմունք է առաջացրել սոցիալական ցանցերում։ Շատ իրավապաշտպաններ հանդես են եկել՝ ի պաշտպանություն երգչի։ Իրանական «Մարդու իրավունքների ակտիվիստներ» լրատվական գործակալության տվյալներով՝ 2024 թվականին Իրանում նմանատիպ պատժի է դատապարտվել առնվազն 131 մարդ՝ ընդհանուր առմամբ 9 957 մտրակի հարվածով։