Ադրբեջանցի դատախազը հղում է անում ՀՀ վարչապետին, ամո՞թ չէ․ Մանե Թանդիլյան

Ճնշումս էր իջել, ինքնազգոցողություն վատ էր, բայց դեղորայքային բուժում ստանալուց հետո մի փոքր վերականգնվել եմ։ Այսօր համեմատաբար լավ եմ զգում։ Ինձ հորդորեցին դադարեցնել հացադուլը, բայց ես հրաժարվեցի։ Այս մասին լրագրողների հետ զրույցում ասել է Ազատության հրապարակում հացադուլ իրականացնող Մանե Թանդիլյանը։

Նա նշեց, որ հացադուլն ուղղակի մարդկային խնդրանք է Բաքվի բանտում ապօրինաբար պահվող Ռուբեն Վարդանյանին, որ իրեն ողջ–առողջ սպասում ենք ամեն օր։

«Սա անպայման չէ, որ նրան հասնի, բայց ինքը պետք է իմանա, որ մենք իր կյանքով մտահոգ ենք։ Վարդանյանը հայ ժողովրդի այնպիսի զավակ է, որ պետք է արժանանա հայ ժողովրդի համապատասխան վերաբերմունքին։ Նա ամբողջ աշխարհում բարձր է պահել հայ ժողովրդի պատիվը, պետք է թույլ չտանք, որ նման հայորդու կյանքը սպառվի Բաքվի բանտում»,– ասաց Թանդիլյանը։ 

Անդրադառնալով Նիկոլ Փաշինյանի՝ գերիների վերաբերյալ հայտարարություններին՝ նա ասաց․ «Նրանք ստախոսներ են։ Երբ գերիները վերադառնում են տարբեր ջանքերի շնորհիվ՝ իրենց են վերագրում, երբ որ չեն վերադառնում, ասում են՝ անում ենք ամեն բան, բայց արդյունք չկա։ Սրանք ստախոսների իշխանությունն են։ Եթե ինչ–որ մեկը հավատում Նիկոլ Փաշինյանի, Արթուր Հովհաննիսյանի, Անդրանիկ Քոչարյանի որևէ ասած բառի, ուրեմն կարեկցում եմ այդ անձին։ Նրանց հավատալ՝ նշանակում է ինքնախաբեությամբ զբաղվել։ Եթե արել եք որևէ բան, ապա ինչու եք հաջորդ օրն ասուլիսում այնպիսի հայտարարություններ անում, որով Ռուբեն Վարդանյանի վրա հատորներ են ավելանում։ Ադրբեջանցի դատախազը հղում է անում ՀՀ վարչապետին, ամո՞թ չէ։ Նրանք ուղղակի շահառու են, որ այդ մարդիկ չվերադառնան։ Էլ խաբվող չկա, մարդիկ արդեն սկսել են տեսնել իրենց»։