Կոնյակներ, ջութակ, ականջօղ, թեյի բաժակներ և ժամացույց գողացած 28-ամյա երիտասարդը կալանավորվել է (տեսանյութ)

Բնակարանային գողության բացահայտումը հատկապես բարդանում է, երբ մտնում են չբնակեցված տուն: Հենց նման դեպքեր էին արձանագրվում անցած տարեվերջին ու այս տարվա սկզբին Էջմիածնում և մոտակա բնակավայրերում: Այս ժամանակաշրջանն էլ պատահական չէր. Ամանորի տոներին շատերն են օրերով լքում տունը:

Նման վերջին ահազանգը Քրեական ոստիկանության Արմավիրի մարզային վարչությունում ստացվեց հունվարի 12-ին: Այդ օրը վերադառնալով տուն` Պտղունք գյուղի բնակիչը հայտնաբերել էր պատուհանը բաց, իսկ տնից գողացել էին ոսկյա զարդեր ու փող:
Քրեական ոստիկաններն ուսումնասիրեցին նաև այս դեպքի հանգամանքները, համեմատեցին նմանատիպ նախորդ դեպքերի հետ և վարկած առաջ քաշեցին, որ չորսն էլ նույն անձի արածն է, որը գործում է միայնակ:

Հունվարի 12-ից հետո նման ահազանգերը դադարեցին, սակայն, քրեական ոստիկանների օպերատիվ միջոցառումներն ու նախաքննական մարմնի քննչական գործողությունները շարունակվեցին:

Իսկ փետրվարի 27-ին Արմավիրի քրեական ոստիկանները ստացան տեղեկություն, որ կասկածյալը կրկին ոտք է դրել հանցավոր ճանապարհ: Ժամը 18-ին Էջմիածնի Արագածի 2-րդ զանգվածի բնակիչ 28-ամյա երիտասարդը Էջմիածնի Բաղրամյան փողոցում, գողություն կատարելու կասկածանքով, ձերբակալվեց ու տեղափոխվեց վարչություն:

Ձերբակալվելուց ժամեր առաջ, դարձյալ օգտվելով բնակարանատիրոջ բացակայությունից, մետաղյա լինգով բացելով եվրապատուհանը` մտել էր Մրգաստան գյուղի տներից մեկն ու գողացել զարդատուփ: Նա խոստովանել է արարքը: Նրա անձնական խուզարկությամբ հայտնաբերվել են մետաղյա լինգը և գողոնի մի մասը` ժամացույցը: Ըստ նրա` զարդատուփում եղած մնացած իրերը ճանապարհին նետել է։

Հետագա քննչական գործողություններով հիմնավորվեց, որ հենց նա է կատարել նախորդ չորս բնակարանային գողությունները:
Մասնավորապես, դեկտեմբերի 30-ին ստացվել էր հաղորդում, որ Էջմիածնի Արամ Մանուկյան թաղամասում գտնվող չբնակեցված տան եվրապատուհանը բացել-մտել և գողացել են երկու շիշ կոնյակ և ջութակ։

Հունվարի 8-ին ստացված հաղորդման համաձայն` քաղաքացին եղբոր չբնակեցված տունը հայտնաբերել էր տակնուվրա արած ու թալանած: Տեխնիկական միջոցի գործադրմամբ բացել էին եվրապատուհանը և հափշտակել թեյի բաժակներ, տղամարդու ձեռքի ժամացույց և երեք շիշ կոնյակ։

Հունվարի 9-ին մեկ այլ քաղաքացի հայտնել էր, որ ծնողների բացակայության ընթացքում բացել էին եվրապատուհանը, մտել Ոսկեհատ գյուղում գտնվող տուն և գողացել մեկ զույգ ոսկյա ականջօղ, երկու ոսկյա մատանի և մետաղադրամներ։
Եվ վերջապես, հունվարի 12-ին ստացված ահազանգն էր Պտղունք գյուղից:

Այս ամենը հիմնավորելուց հետո, դատարանի որոշմամբ, 28-ամյա երիտասարդը կալանավորվել ու տեղափոխվել է քրեակատարողական հիմնարկ: Վաղարշապատի քննչական բաժնում նախաձեռնված քրեական վարույթը շարունակվում է: