Քննարկվել են ՀՀ պետական սահմանի ցամաքային անցման կետերում մաքսային սպասարկման աշխատանքները

ՊԵԿ նախագահ Էդուարդ Հակոբյանն աշխատանքային շրջայց է կատարել Գյումրու և Վանաձորի մաքսային հսկողության գոտիներում, այցելել  Բագրատաշեն և Այրում անցակետեր՝ մաքսային ծառայության աշխատանքային գործընթացների կազմակերպմանը տեղում հետևելու նպատակով։

ՊԵԿ-ից հայտնում են, որ ներկայացվել են մաքսային անցակետերի ենթակառուցվածքները, ընթացակարգերը, դրանց կիրառման և կազմակերպման հերթականությունը, ինչպես նաև գործարկված էլեկտրոնային համակարգերը: Քննարկվել են Հայաստանի պետական սահմանի ցամաքային անցման կետերում մաքսային սպասարկման և հսկողության ուղղությամբ իրականացվող աշխատանքները, շինարարությունների ընթացքն ու ընթացիկ խնդիրները։

ՊԵԿ ղեկավարը շրջայցով եղել է նաև Գյումրու և Վանաձորի հարկ վճարողների սպասարկման սրահներում։ Ներկայացվել է ստորաբաժանումների գործառույթների պատշաճ իրականացման գործընթացը և քննարկվել՝ քաղաքացիներին ու տնտեսվարողներին ներկա հարկային ռեֆորմների պայմաններում աջակցելու գործիքակազմի ընդլայնման և բարելավման ուղիները:

Այցերի ընթացքում դիտարկվել են քաղաքացիների և արտաքին տնտեսական գործունեություն իրականացնողների սպասարկման համար ստեղծված պայմանները՝ ընդգծելով գործընթացների բոլոր փուլերի պատշաճ կազմակերպումը:

ՊԵԿ նախագահը կարևորել է առևտրի դյուրինացման, ՊԵԿ համակարգերի թվայնացման, ենթակառուցվածքների արդիականացման, ինչպես նաև հարկ վճարողների սպասարկման որակի բարձրացման ուղղությամբ տարվող աշխատանքները։

Միաժամանակ, անդրադառնալով վերջին շրջանում ՊԵԿ բարեփոխումներին և արձանագրված ձեռքբերումներին, քննարկվել են հարկային և մաքսային ոլորտների զարգացման ծրագրերն ու հեռանկարները։