Արցախի մայրերը կրեցին պատերազմի ցավը, դարձան ազգային ինքնության պահպանման խորհրդանիշ

«Սիրելի՛ հայ կանայք, մայրեր, քույրեր ու դուստրեր,

Մարտի 8-ը՝ Կանանց միջազգային օրը, հայ ժողովրդի համար միշտ եղել է սիրո, հարգանքի և երախտագիտության օր՝ նվիրված այն կանանց, ովքեր ընտանիքի ամուր հենասյունն են, հասարակության ոգին և մեր ազգային դիմադրության անկոտրում մարտիկները։
 

Սակայն այս տարի ևս մենք դիմավորում ենք այս օրը կորստի ու ցավի զգացումով, քանզի հազարավոր արցախցի կանայք զրկված են իրենց հայրենիքից, իրենց տներից, նախնիների շիրիմներից ու կյանքի բնականոն ընթացքից։ Նրանք, ովքեր սերունդներ շարունակ ապրել ու կերտել են Արցախը, այսօր կանգնած են անորոշության առջև՝ հեռու իրենց արմատներից, բայց երբեք չկորցնելով իրենց ոգին և հավատքը։
 

Արցախի մայրերը, քույրերը, դուստրերը ոչ միայն կրեցին պատերազմի ու բռնի տեղահանության ցավը, այլև դարձան տոկունության և ազգային ինքնության պահպանման խորհրդանիշ։ Այս օրը մենք ոչ միայն շնորհավորում ենք ձեզ, այլև գլուխ ենք խոնարհում ձեր տոկունության, ձեր զոհողությունների և ձեր պայքարի առաջ։
 

Թող որ այս տոնը նաև հիշեցում լինի մեզ բոլորիս՝ շարունակելու պայքարել հանուն արդարության, հանուն հայրենիքի վերատիրացման և հանուն այն սերունդների, որոնք պետք է ապրեն իրենց իսկ հողում, իրենց իսկ տներում՝ ազատ ու ապահով։
 

Շնորհակալ ենք ձեր սիրո, տոկունության և անսահման նվիրումի համար։ Շնորհավոր ձեր տոնը, սիրելի՛ հայ կանայք։ Ձեր ուժն է պահպանում մեր հավատքն ու մեր ապագան։

Փառք հայ կնոջը՝ հայ ազգի սրտին ու ոգուն»։