Շա՜տ մեծ տարբերություն կա նախորդ դարավերջին ապրող ու մեր ժամանակաների կնոջ միջև. Մարջան Ավետիսյան

Euromedia24-ի զրուցակիցը սիրված դերասանուհի Մարջան Ավետիսյանն է

- Կյանքը կանանց համար նոր հոգսեր է ավելացնում ժամանակի հետ ոչ միայն թրենդային մրցավազքի մեջ դիմանալու, այլև անվտանգային միջավայրի ռիսկերի իմաստով:

- Իրականում յուրաքանչյուր մարդ, անկախ սեռից ինքն է պատասխանատու իր կայացրած որոշումների և ծանրաբեռնվածության համար:
Եթե մարդն ուզում է կայանալ ու ինքնադրսևորվել, անշուշտ, պետք է  դուրս գա կոմֆորտ զոնայից:
Մերօրյա կնոջ թրենդային մրցավազքն  էլ գուցե ինքնադրսևորման գործիքներից մեկն է, չգիտեմ...:

- Սոցիալական բեռի հետ նաեւ կնոջ էությունն է էվոլյուցիոն փոփոխություններ կրում ժամանակաշրջանի հետ: Ո՞րն էր կնոջ հոգսն ու հաճույքը սրանից առաջ, երբ 30 տարվա պետություն դառնալու շրջանում էին, հիմա և վաղը, եկեք դիտարկենք ըստ փուլերի։

- Ենթադրում եմ  21-րդ դարի կինը ավելի անկաշկանդ է ընդունում  իր ժամանակի հրամայականները, ինքն իրեն գտնելու, ինքն իրեն զբաղեցնելու, մասնագիտանալու որևէ ոլորտում, որտեղ իրեն զբաղված ու գնահատված կզգա:
Իմ մանկության տարիները համընկել են մեր պետության ծանր շրջանների հետ ու իմ հիշելով մեծ, շա՜տ մեծ տարբերություն կա նախորդ դարավերջին ապրող ու մեր ժամանակաների կնոջ միջև:
Յուրաքանչյուր ժամանակ իր ապրելու կանոնն ու կերպն է թելադրում:

Իհարկե, թրենդի ու թելադրանքի լուսանցքում մնում են շատ նուրբ մարդկային, մարդուն մարդ դարձնող ապրումներ: Թրենդային վազքը ոտնատակ է տալիս նաև մեր գոյը պայմանավորող մի կարևոր զգացում`ապրումակցումը, որով  մարդն ու անասունը զատվում  են:

- Ի՞նչ է ուզում կինը... Տպավորություն է, որ կինը ավելի շատ  ձգտում է ոչ այնքան սիրո, սիրված լինելու, որքան իր ինքնակայացմանը: Կնոջ ջանքերը այլեւս մեկ մարդու համար չեն, այլ` միջավայրում իր տեղի, իր անհատականության համար են: Ճի՞շտ է այս եզրահանգումը:

- "Признание"... այս բառի հայերեն թարգմանությունը իմաստային մեծ տարբերություն ունի այդ պատճառով օգտագործում եմ ռուսերենը:
Եվ սա միայն կանանց չի վերաբերվում, այլ 21-րդ դարի մարդուն, եթե կմխիթարվենք ասեմ` վերաբերվում է նաև  շատ այլ ազգերի:
Ձեր եզրահանգումներն, իհարկե, տեղավորվում են մեր ժամանակի բարքերի ու կենսակերպի մեջ:
Եթե շատ խորը նայենք, ապա պետությունն է  թելադրում իր քաղաքացու ինչպիսին լինելը`անկախ սեռից:
 
- Ինչու՞ փոխվեց կնոջ համար ծնված տղամարդու կերպարը: Այլեւս չենք ֆետիշացնում իրենց, իրենք էլ չեն երկրպագում մեզ, այլ մրցակցում ենք միմյանց հետ:

- Փոխվեց, որովհետև աշխարհում համահավասարեցման տենդենցները միտված են տղամարդու դերի նվազեցմանը:
Սա արհեստական գործընթաց է և մարդկության  վրա մեծ ազդեցություն ունի:
Տա´ Աստված, մի օր Ձևը կփոխարինի Բովանդակությանը և ամեն բան կվերադառնա ի շրջանս յուր: