Փաշինյանն անկախության հետ այնքան կապ ունի, որքան Ալիևը՝ մարդասիրության հետ․ Շարմազանով

Քաղաքական գործիչ, ՀՀԿ փոխնախագահ Էդուարդ Շարմազանովը, անդրադառնալով Նիկոլ Փաշինյանի՝ «յաշիկներ» հետ բերելու հայտարարությանը, նշել է․ «Հլը որ միայն տարածք է տալիս, Արցախ է տալիս ու գերիներ։ Ի՞նչ է հետ բերելու։ Երկրի հերն անիծել է, Արցախը տվել է Ադրբեջանին։ Կադաստրի վկայականը կորցրել է, ասում է՝ կադաստրի վկայական չունեն։ Ի՞նչն է հետ բերելու։

Նա Թուրքիա և Ադրբեջան պետության տեղապահն է այստեղ, նա Էրդողանի և Ալիևի տեղապահն է ՀՀ–ում։ Որովհետև ՀՀ որևէ ղեկավար երբեք կասկածի տակ չի դրել Անկախության հռչակագիրը, երբեք կասկածի տակ չի դրել Արցախի ինքնորոշման իրավունքը, երբեք հարցականի տակ չի դրել Արարատի կապը հայ ժողովրդի հետ, երբեք հարցականի տակ չի դրել Հայոց ցեղասպանության միջազգային ճանաչումը և այդպես շարունակ։ Նիկոլ Փաշինյանն անկախության հետ այնքան կապ ունի, ինչքան Ալիևը՝ մարդասիրության հետ։ Ալիևի կողմից մաշված մեկը խոսում է կիսամաշվածությունից։ Ալիևի ու Էրդողանի արանքում մաշվել է, Հայաստան պետությունն էլ հետն է մաշել»։

Նրա խոսքով՝ Փաշինյանին իշխանության բերել են Թուրքիան ու «գլոբալ Արևմուտքը» գունավոր հեղափոխության արդյունքում, որին նպաստել են Հայաստանի քաղաքական այն շրջանակները, որոնք «տաս տարի շարունակ կեղծիքներ ու լուտանքներ են տարածել ՀՀԿ–ի ու Սերժ Սարգսյանի վրա»։