«SMS»-ով կլքե՞ք պաշտոնը. ՀԿԿ նախագահի թեկնածուն հարցը «պրովոկացիա» է որակել

Հակակոռուպցիոն կոմիտեի անդամի թեկնածու Կարեն Բատիկյանը, լրագրողների հետ զրույցում անդրադառնալով հարցին, թե ո՞նց է գնահատում, երբ որ ուժային կառույցի ղեկավարին «SMS»-ով ասում են՝ շնորհակալություն, ցտեսություն, ասաց, որ այդ հարցը գնահատում է որպես պրովոկացիա։

Հարցին՝ եթե ստանաք նման «SMS», ինչպե՞ս կվարվեք, նա արձագանքեց. «Գիտեք ինչ, պետական կառավարման համակարգը այնքան բարդ համակարգ է, այնքան տարբեր տեսակի հարցեր են լինում, որ դրանք երբեմն հանրային քննարկման դաշտում չեն կարող լինել։ Դրա համար նորից եմ կրկնում՝ որպես նախկինում պաշտոն զբաղեցրած անձ և այս պաշտոնին հավակնած անձ, այդ հարցին չեմ պատասխանում»:

Անդրադառնալով նրան, որ Հակակոռուպցիոն կոմիտեն քննում է մարտի 1-ի գործը, կկարողանա՞ք բացահայտել, նա ասաց. «Եթե սպորտսմենը մոտենում է ծանրաձողին, այդ պահին ինքը մտածում է, որ հաստատ բարձրացնելու է ծանրաձողը: Բնականաբար, ոչ մի քրեական գործ անկախ վաղեմությունից կամ ձգձգվածության աստիճանից, քննված լավ ու վատ որակներից, չպետք է վախեցնի այն պաշտոնի թեկնածուին, կոնկրետ դեպքում ինձ, ինչը որ հավակնում եմ ստանալ»:

Դիտարկմանը, որ Կոռուպցիայի կանխարգելման հանձնաժողովը բացասական բարեվարքություն է տվել թեկնածուներից երկուսին, որից մեկն ինքն է, արդյոք հանձնաժողովի եզրակացության հետ համաձայն է, Կարեն Բատիկյանն ասաց. «Իմ կարծիքով համապարփակ և պատշաճ ուսումնասիրություն չի կատարվել, քանի որ ժամանակահատվածի մի ընդհանուր բաժին՝ 2022 թվականի գույքի վերաբերյալ վերլուծությունները բացակայում են ընդհանրապես։ Ես փաստաթղթեր եմ ներկայացրել այդ հարցերի կապակցությամբ։

Եթե ինձ տրվեր կոնկրետ հարցադրում և կոնկրետ ժամանակահատված, միգուցե ես ավելի փաստարկված պատասխանեի: Կարելի է ասել՝ ոտքի վրա եմ պատասխանել»:

Հարցին՝ այդտեղ միտո՞ւմ տեսնո՞ւմ է, Բատիկյանը պատասխանեց. «Եթե միտում տեսնեմ, ուրեմն ինչ-որ մեկին պիտի ինչ-որ մի բանի մեջ մեղադրեմ։ Միտումը չի կարող լինել մենակ դիտավորության տեսքով, կարող է լինել ոչ պատշաճ կատարելու արդյունքում: Համենայնդեպս ունենք նման եզրակացություն և իմ կարծիքով եզրակացության մեջ նշված հանգամանքները չէին բերում այն մտքին, որ ինձ կարելի էր տալ դրական եզրակացություն:

Ես լրատվամիջոցներից եմ տեղեկացրել, որ բացասական եզրակացություն է եկել: Երբ ստացա մի քանի օր առաջ բարեվարքության եզրակացությունը և ուսումնասիրելով իջնում է ներքև, տպավորություն այնպիսին է, որ պիտի տեսնեմ, որ գրված է դրական եզրակացություն, բայց եկա ու ի զարմանս ինձ տեսա, որ բացասական եզրակացություն է, որովհետև մի քանի տեղեր կարևորագույն տեղերում արձանագրել էին, որ սա ճիշտ է, սա արժանավատ է և այլն»: