Ադրբեջանն ու՞մ է հասցեագրում այդ հայտարարությունները․ Արմեն Այվազյան (տեսանյութ)

Ադրբեջանի թիրախային լսարանը կարելի է բաժանել երեք հիմնական խմբի.

 

1. Առաջին թիրախը Հայաստանի ժողովուրդն է. Ադրբեջանը փորձում է հոգեբանական ճնշում գործադրել հայ հասարակության վրա՝ պահելով մեզ մշտապես լարվածության մեջ։ Նպատակը հայ ժողովրդին թույլ չտալն է դուրս գալ Արցախի ոչնչացման, պատերազմական կորուստների, ՀՀ տարածքների բռնազավթման և դիվանագիտական ձախողումների հոգեբանական տրավմայից։ Սա հոգեբանական պատերազմի գործիք է, որով Բաքուն բացահայտ ցույց է տալիս, որ Փաշինյանի կառավարության հետ վարվող այսպես կոչված բանակցություններն ու համաձայնեցված փաստաթղթերը նրա համար ունեն ԶՐՈ ԱՐԺԵՔ։

Այս առումով հատկանշական է, որ երկու օր առաջ Բաքու էր ժամանել ԱՄՆ նախագահ Թրամփի անձնական ներկայացուցիչ Սթիվ Վիթքոֆը, իսկ այսօր Բաքվում պաշտոնական այցով գտնվում է ՌԴ Դաշնային խորհրդի պատվիրակությունը՝ նախագահ Վալենտինա Մատվիենկոյի գլխավորությամբ։ Սա վկայում է, որ Ալիևը ստացել է և՛ ԱՄՆ-ի, և՛ ՌԴ-ի համաձայնությունը Հայաստանի դեմ սադրանքներ կազմակերպելու և առնվազն հոգեբանական պատերազմ մղելու համար։

 

2. Երկրորդ թիրախը Ադրբեջանի ժողովուրդն է. Ալիևը ձգտում է իր բնակչությանը պահել մշտական լարվածության մեջ՝ ներկայացնելով Հայաստանը որպես մշտական արտաքին թշնամի ու վտանգ։ Այս միջոցով նա փորձում է ոչ միայն արդարացնել հնարավոր նոր ռազմական ագրեսիան Հայաստանի դեմ, այլև ցրել և կանխել ներքին դժգոհությունները։

 

3. Երրորդ թիրախը Իսրայելն է. Ալիևը ուղերձ է հղում Իսրայելին, որ պատրաստ է աջակցել Իրանի դեմ Իսրայելի և ԱՄՆ-ի հնարավոր ռազմական գործողություններին։ Նա ակնարկում է, որ այդ դեպքում կփակի Իրանի հյուսիսային ճանապարհը, որն անցնում է Հայաստանով, իսկ բարենպաստ պայմաններում կարող է ներխուժել Իրանի հյուսիսային շրջաններ՝ խրախուսելով թյուրքալեզու իրանցիների ապստամբությունը։

Ադրբեջանի ՊՆ-ի այս ապատեղեկատվական հայտարարությունները հերթական անգամ ապացուցում են, որ Փաշինյանի կոլաբորացիոնիստական կառավարության՝ խաղաղության պայմանագրի վերաբերյալ հեքիաթները զուրկ են որևէ հիմքից։

 

Հայ ժողովուրդը պետք է գիտակցի, որ Փաշինյանի խոսքերը ոչ մի արժեք չունեն հատկապես Հայաստանի անվտանգությանը վերաբերող հարցերում։ Հայոց փրկությունը համապարփակ ինքնապաշտպանության կազմակերպման և դիմադրության մեջ է։ Այս փուլում Հայաստանի ղեկին պետք է կանգնի հայկական ռազմավարական մտքի կրող ղեկավարություն՝ կազմված գաղափարական, ազգասեր և վճռական գործիչներից»։