Եթե Հայաստանում չձևավորվի իրական ընդդիմություն և դիմադրական շարժում, մեր ապագան կլինի շատ ավելի տխուր, քան այժմ Գազայում է. Արմեն Այվազյան
ԲլոգոսֆերաՔաղաքական գիտությունների դոկտոր, պատմաբան Արմեն Այվազյանի ֆեյսբուքյան գրառումը.
«Ըստ Փաշինյանի, այժմ պետք է «խորհրդակցություններ սկսել Հայաստանի եւ Ադրբեջանի միջեւ խաղաղության համաձայնագրի համաձայնեցված նախագծի ստորագրման շուրջ»։ Այսինքն՝ նորից պետք է բանակցել Ադրբեջանի հետ, որպեսզի նա համաձայնվի ստորագրել այսպես կոչված «խաղաղության համաձայնագիրը»։
Փաշինյանը երբեք անվտանգության երաշխիքների մասին չի խոսում։ Նա նաև երբեք չի խոսում վստահության մասին՝ կարծես Ադրբեջանին և Թուրքիային կարելի է լիովին վստահել։ Այնինչ Ադրբեջանի դաշնակից Իսրայելն անընդհատ կոպտորեն պաղեստինցիների հետ կնքված համաձայնագրերը։ Զինադադարի առաջին փուլից հետո հրաժարվում է համաձայնեցված կետերից, նոր պահանջներ է առաջադրում։ Նույնպես վարվում է և վարվելու է Բաքուն։ Ադրբեջանն ու Իսրայելը միմյանց փորձը օգտագործում են ցեղասպանական պատերազմներում։
Հայաստանի Հանրապետության վայ-ղեկավարությունն ահա այսպես է մխրճվել անհեթեթությունների մեջ։ Բայց իրականում սա լիակատար կապիտուլյացիայի ընթացիկ գործընթաց է, որը ադրբեջանցիներին ու թուրքերին բերելու է Երևանի կենտրոն, եթե միայն Փաշինյանին կանգնեցնող չլինի։
-------------------------------------
Միջազգային քաղաքական համակարգի երևացող ու չերևացող պարագլուխները դիտում են հայերին ու պաղեստինցիներին նույն կերպ՝ որպես ազգային ու հողային իրավունքներից զուրկ ժողովուրդների, որոնց կարելի է և պետք է ցուցադրաբար ենթարկել ցեղասպանության։ Դա էլ հենց անում են և՛ Հայաստանում, և՛ Պաղեստինում։ Հայաստանում դիմադրությունը քաղաքական ղեկավարության մակարդակում վաղուց ճնշվել է։ Նշանակվել են խամաճիկային իշխանություններ, որոնք հլու-հնազանդ ենթարկվում են օտար տերերին՝ այն աստիճան, որ ռազմավարական նշանակության տարածքները, հայկական բնիկ հողերը, ազգային արժանապատվությունն ու բնական իրավունքները հերթով հանձնվում են թշնամուն։
Գազայում իրավիճակը տարբեր է. «Համասն» ունի անձնուրաց գաղափարական ղեկավարներ և անվտանգության գործուն համակարգ։ ՀՀ-ն չունի ո՛չ նվիրյալ ղեկավարներ, ո՛չ անվտանգության արդյունավետ համակարգ։ ՀՀ-ում գործակալներն ու դավաճանները ծաղկում ու բարգավաճում են։ Իր դիմադրության շնորհիվ «Համասն» ունի դաշնակիցներ, ՀՀ-ն՝ չունի։
Ու թեև վերջին մեկ տարվա ընթացքում պաղեստինցիները միայն Գազայում մինչև զինադադարի կնքումն օրական միջին հաշվով 100-ից ավելի զոհեր էին տալիս, այս պահի դրությամբ Հայաստանի ապագան ավելի վտանգված է թվում։ Դա նրանից է, որ Գազայում դիմադրություն կա, իսկ Հայաստանում՝ փաստացիորեն չկա, խեղդված է։
Եթե Հայաստանում չձևավորվի իրական ընդդիմություն և դիմադրական շարժում, մեր ապագան կլինի շատ ավելի տխուր, քան այժմ Գազայում է։
ԴԻՄԱԴՐՈՒԹՅՈՒՆԸ ԿՅԱՆՔ Է, ՀՆԱԶԱՆԴՈՒԹՅՈՒՆԸ ՑԵՂԱՍՊԱՆ ԹՇՆԱՄՈՒՆ՝ ՄԱՀ»։
ՈՒՂԻՂ ԵԹԵՐ
Ամենադիտված 
Ցմահ դատապարտյալ Արթուր Քոչարյանն ազատ է արձակվել
