Մեր թատրոնն իր դռները չփակեց անգամ ավերիչ երկրաշարժից հետո. Տիգրան Վիրաբյան

Այսօր Թատրոնի օրն է: Մեր թատրոնն իր դռները չփակեց անգամ ավերիչ երկրաշարժից հետո: Մեր արտիստները բեմ բարձրացան՝ այդ սարսափելի օրերին ուժ ու ժպիտ տալու իրենց հանդիսատեսին:

 

Գյումրու թատրոնը արդեն 19 տարի իմ տունն է՝ ո՛չ առաջին, ո՛չ էլ երկրորդ. սա իմ տունն է, որտեղ ապրել եմ:

 

Հիշում եմ ամենադժվար օրերը, երբ գրիմանոցում նստած՝ սրտատրոփ սպասում էինք, որ տոմսավաճառը ներս գա ու ասի՝ վերջ, դահլիճում 10 հոգի կա, կարող եք բարձրանալ բեմ:

 

Միասին՝ ուս ուսի տված, հաղթահարեցինք բոլոր մարտահրավերները ու քայլեցինք առաջ՝ մեր նվիրական երազանքի հետևից: Այսօր Գյումրու Դրամատիկականի ողնաշարն ամուր է, ոգին՝ մարտական, ճակատն էլ՝ պարզ:

 

Մենք կարողացանք ստեղծել մեր երազանքի թատրոնը:

Թատրոն, որն ամենապահանջվածներից է Հայաստանում:

 

Թատրոն, ուր հանդիսատեսը շատ ներկայացումների համար ամիսներ շարունակ տոմս է փնտրում:

 

Թատրոն, որը համալրվել է ֆանտաստիկ երիտասարդներով, որոնց թիկունքին պրոֆեսիոնալ նվիրյալներն են:

 

Եվ վերջապես՝ թատրոն, որի տերը արտիստներն են:

Ինձ համար հայրենիքը սկսվում է Գյումրիից և իմ թատրոնից: Շնորհավո՛ր, թատրոնո՛վ շնչող մարդիկ: