Օդաչուն 10,700 մ բարձրության վրա կորցրել է գիտակցությունը. ինքնաթիռը թռել է առանց կառավարման

Ֆրանկֆուրտից Սևիլիա թռչող Lufthansa ավիաընկերության չվերթի ժամանակ տեղի է ունեցել միջադեպ, որը կարող էր հանգեցնել աղետի։ Իսպանիայի ավիավթարների հետաքննության հանձնաժողովի տվյալներով՝ 2024 թվականի փետրվարի 17-ին Airbus A321-ը մոտ տասը րոպե մնացել է առանց ակտիվ կառավարման 10,700 մետր բարձրության վրա, այն բանից հետո, երբ երկրորդ օդաչուն կորցրել է գիտակցությունը։ Այս մասին գրում է Business Insider-ը։

Դեպքը տեղ է ունեցել այն ժամանակ, երբ ինքնաթիռի հրամանատարը դուրս է եկել խցիկից՝ զուգարանից օգտվելու համար։ Այդ պահին երկրորդ օդաչուն, մենակ մնալով, հանկարծակի ուշագնաց է եղել, ենթադրաբար՝ նախկինում չհայտնաբերված նյարդաբանական խանգարման պատճառով։

Ավտոպիլոտը շարունակել է պահել ինքնաթիռը նախատեսված երթուղու վրա, սակայն օդաչուի մարմինը, որը անգիտակից վիճակում էր, մասամբ ազդել է կառավարման վրա, ինչի հետևանքով ինքնաթիռը փոքր-ինչ շեղվել է իր ուղղությունից։ Սակայն հրամատարը չի կարողացել անմիջապես վերադառնալ օդաչուի խցիկ. դուռը փակ է եղել, իսկ մուտքի համակարգը չի աշխատել, քանի որ երկրորդ օդաչուն չէր կարողացել հաստատել մուտքը։

Ութ րոպե անց երկրորդ օդաչուն ուշքի է եկել և կարողացել է բացել դուռը։ Հրամանատարը անմիջապես վերադարձել է իր տեղը, ստանձնել ինքնաթիռի կառավարումը և որոշել է արտակարգ վայրէջք կատարել Մադրիդի օդանավակայանում՝ նշելով, որ իր գործընկերը վատառողջ տեսք ուներ։

Հաղորդվում է, որ վայրէջքից հետո օդաչուին օգնություն են ցուցաբերել բժիշկները։