Մախաչկալայի օդանավակայանի անկարգությունների մասնակիցները դատապարտվել են մինչև 15 տարվա ազատազրկման

Ստավրոպոլի դատարանը վճիռ է կայացրել Դաղստանի յոթ բնակչի նկատմամբ, որոնք 2023-ի հոկտեմբերին Մախաչկալայի օդանավակայանում հարձակում էին իրականացրել իսրայելցիների դեմ։ Դատապարտյալները մեղավոր են ճանաչվել զանգվածային անկարգությունների, իրավապահների կյանքի դեմ հարձակումների և տրանսպորտային անվտանգության խախտման համար։

Նրանցից յուրաքանչյուրին նշանակվել է 14-ից 15 տարվա ազատազրկում, որոնցից առաջին երեք տարին նրանք կանցկացնեն բանտում, ապա կտեղափոխվեն խիստ ռեժիմով գաղութ։ Ըստ դատարանի՝ ամբաստանյալները վնաս են հասցրել օդանավակայանին՝ ավելի քան 24 մլն ռուբլու չափով։ Վիրավորվել է 30 ոստիկան, որոնցից 23-ը՝ լրջորեն։

Ընդհանուր առմամբ, 142 մարդ է ենթարկվել քրեական հետապնդման, ավարտվել է 130-ի գործերի նախաքննությունը, իսկ յոթ անձ դեռ հետախուզման մեջ է, այդ թվում՝ երեք հիմնական կազմակերպիչը, հայտնում է Лента.ру-ն։