1933 թվականին այս օրը «Ալմաստ» օպերայի ներկայացմամբ տեղի ունեցավ Օպերայի և բալետի թատրոնի բացումը

1933 թվականին այս օրը Ալեքսանդր Սպենդիարյանի «Ալմաստ» օպերայի ներկայացմամբ տեղի ունեցավ Օպերայի և բալետի թատրոնի բացումը։ Այնուհետև 1939թ. վերանվանվանվեց «Ալեքսանդր Սպենդիարյանի անվան օպերայի և բալետի պետական թատրոն»։ Թատրոնի ստեղծագործական գլուխգործոցները դարձան «Ալմաստ» և «Անուշ» օպերաների բեմադրությունները։

Համաձայն Երևանի գլխավոր հատակագծի՝ Ալեքսանդր Սպենդիարյանի անվան օպերայի և բալետի ազգային ակադեմիական թատրոնի շենքը կառուցվեց քաղաքի հյուսիս-հարավ առանցքի վրա՝ Հյուսիսային պողոտայի գլխամասում, որտեղ գտնվում էր Գեթսեմանի մատուռը։ Այսօր թատրոնի ճեմասրահում կանգնեցված է խաչքար՝ ի հիշատակ Գեթսեմանի մատուռի։ Թատրոնի շենքը նախագծվել է 1926-1936թթ. որպես «Ժողովրդական տան համալիրի թատրոն» ճարտարապետ՝ Ալեքսանդր Թամանյանի կողմից։ Համալիրի նախագիծը չի իրականացվել, սակայն «ժողովրդական տուն» անվանումը պահպանվել է։ Օպերայի և բալետի ազգային ակադեմիական թատրոնի շենքի հանդիսավոր հիմնադրումը կայացել է 1930թ. նոյեմբերի 28-ին։ Ալեքսանդր Թամանյանի նախագծի հիմնական գաղափարը մեկ շենքի մեջ ձմեռային (հյուսիսային կողմ) և ամառային (հարավային կողմ) դահլիճները միավորելն էր։ 1939թ. ավարտվեց կառույցի ձմեռային թատրոնի հատվածը, իսկ 1953թ.՝ ամառայինը, որը վերափոխվեց համերգային դահլիճի (այժմ՝ Ա.խաչատրյանի անվ. համերգասրահ)։ Ըստ նախագծի՝ շենքի գեղարվեստական ձևավորման հորինվածքում պետք է լինեին զարդաքանդակներ, որմնանկարներ, արձաններ՝ հայ ժողովրդական բանահյուսությունից և հայ դասական գրականությունից վերցրած թեմաներով։ Թատրոնի նախագիծը 1937թ. Փարիզի համաշխարհային ցուցահանդեսում «Ոսկե մեծ» մրցանակի է արժանացել։ 1978-1980թթ. շենքի մի մասը, իսկ 1981-1983թթ.՝ համերգային մեծ դահլիճը, հիմնովին վերանորոգվել են։ Վերակառուցումից հետո օպերայի և բալետի թատրոնի դահլիճն ունի 1200 նստատեղ, համերգային դահլիճը՝ 1400։