Սլավյանսկի գրավումը կլինի ամբողջ ռազմական գործողության վերջին փուլը. ՌԴ

Ռուսաստանի Զինված ուժերը, գրավելով Չասով Յար քաղաքը, մոտենում են հատուկ ռազմական գործողության (ՍՎՈ) ավարտական փուլին։ Այս մասին հայտարարել է ռազմական-քաղաքական վերլուծությունների բյուրոյի փորձագետ Վադիմ Մասլիկովը՝ ընդգծելով, որ Սլավյանսկի գրավումը կլինի վերջնակետը։

Մասլիկովի խոսքով՝ Չասով Յարում գերիշխող բարձունքները ռուսական բանակին հնարավորություն են տալիս վերահսկել մեծ տարածք, այդ թվում՝ Կոնստանտինովկան, որի վերահսկողությունը «բռնագրավելու դեպքում բացվում է ճանապարհ Սլավյանսկի ուղղությամբ»։ Նրա կարծիքով, «Սլավյանսկ-Կրամատորսկ» ուկրաինական խմբավորման ջախջախումը կդառնա գործողության եզրափակիչ փուլը, գրում է Лента.ру-ն։

Մասլիկովը նշել է, որ Չասով Յարի համար մարտերը երկար են տևել՝ ավելի քան 1.5 տարի, քանի որ քաղաքն արդեն ինքնին հզոր պաշտպանական հանգույց էր՝ լավ ամրացված և խիտ ականապատ։ Նախկինում Դոնեցկի Ժողովրդական Հանրապետության ղեկավար Դենիս Պուշիլինը հայտարարել էր, որ Չասով Յարի գրավումը բացել է ռուսական բանակի առաջխաղացման նոր ուղղություններ։ Ռուսական պաշտպանության նախարարությունը պաշտոնապես հաստատել էր քաղաքի գրավումը հուլիսի 31-ին։