Ալցհայմերի վախ և կասկածելի վարք․ ինչ է հայտնի Թրամփի առողջական վիճակի մասին և ինչ ռիսկ է դա աշխարհին

ԱՄՆ նախագահ Դոնալդ Թրամփի տարօրինակ վարքագիծը վերջին մեկ տարում աճող մտահոգություն է առաջացնում նրա մտավոր ունակությունների վերաբերյալ։ Ինչպես գրում է The Guardian-ը, 79-ամյա նախագահն ընտրարշավային ելույթների և մամուլի ասուլիսների ժամանակ հաճախ շեղվում է թեմայից, չի հիշում փաստեր և դրսևորում է միտք կազմակերպելու խնդիրներ։ Օրինակ՝ ԵՄ ղեկավար Ուրսուլա ֆոն դեր Լայենի հետ հանդիպմանը Թրամփը երկու րոպե խոսել է հողմաղացների մասին, իսկ Գազայի հումանիտար օգնության հարցին չի կարողացել հստակ պատասխանել։

Բացի հոգեկան վիճակի կասկածներից, Թրամփին հուլիսին ախտորոշվել է քրոնիկ երակային անբավարարություն․ նրա ոտքերում առաջանում է այտուց, իսկ ձեռքերի վրա՝ արյան կուտակումներ։ Այնուամենայնիվ, Սպիտակ տունը հայտարարում է, որ նախագահը «բարձր մտավոր ունակություններով է և պատրաստ է ղեկավարել»։ Նրա բժիշկները ապրիլին հաստատել են, որ առողջական վիճակը «նորմալ է»։

Մինչդեռ քաղաքական վերլուծաբաններն ու դեմոկրատ գործիչները ակնարկում են, որ Թրամփը կարող է տառապել տարիքային հոգեկան խնդիրներով, ինչը կարող է ազդել ինչպես իր ընտրարշավի, այնպես էլ արտաքին քաղաքական որոշումների վրա։ Մասնավորապես նշվում է, որ Թրամփի վարքագիծը կարող է վտանգավոր լինել միջազգային ճգնաժամերի, այդ թվում՝ Ուկրաինայի և Գազայի հարցում արդյունավետ առաջնորդություն ապահովելու տեսանկյունից։